శ్రీలంకతో ఉత్కంఠగా జరిగిన తొలి టీ20లో 2 పరుగుల తేడాతో టీమ్ఇండియా విజయం సాధించిన సంగతి తెలిసిందే. దీంతో 3 మ్యాచ్‍‌ల సిరీస్‌లో 1-0 తేడాతో భారత్ ఆధిక్యంలోకి దూసుకెళ్లింది. ఈ మ్యాచ్‌లో శివమ్ మావి 4/27తో అదరగొట్టగా.. యువ సంచలనం ఉమ్రాన్ మాలిక్ 2 వికెట్లతో అతడికి తోడుగా నిలిచాడు. దీంతో పాటే ఈ మ్యాచ్‌లో ఉమ్రాన్ మరో అరుదైన ఘనతను సాధించాడు. భారత్ తరఫున అత్యంత వేగవంతమైన బంతిని విసిరిన బౌలర్‌గా రికార్డుకెక్కాడు. గంటకు 155 కిలోమీటర్ల వేగంతో అత్యంత వేగవంతమైన డెలివరీ వేసిన ఆటగాడిగా రికార్డు సృష్టించాడు.
శ్రీలంకతో జరిగిన మ్యాచ్‌లో కెప్టెన్ డాసున్ శనకను ఔట్ చేసిన బంతిని అతడు గంటకు 155 కిలోమీటర్ల వేగంతో విసిరాడు. ఆఫ్ సైడ్ దిశగా వస్తున్న ఆ బంతిని శనక ఎక్స్‌ట్రా కవర్‌లో ఆడగా.. చాహల్ ఆ బంతిని క్యాచ్ పట్టాడు. దీంతో శనకా పెవిలియన్ చేరాడు. దీంతో అతడు 27 బంతుల్లో 45 పరుగులు చేశాడు. ఈ మార్క్తో.. అంతుకుముందు అత్యంత వేగవంతమైన బంతిని సంధించిన భారత బౌలర్‌గా బుమ్రా పేరిట ఉన్న రికార్డును ఉమ్రాన్ మాలిక్ అధిగమించాడు. బుమ్రా గతంలో అత్యధికంగా గంటకు 153.35 కిలోమీటర్ల వేగంతో బౌలింగ్ చేయగా... మహ్మద్ షమీ గంటకు 153.3 కిలోమీటర్ల వేగంతో, నవదీప్ సైనీ గంటకు 152.85 కిలోమీటర్ల వేగంతో బౌలింగ్ చేశారు. తాజాగా వీరందరినీ అధిగమించి ఉమ్రాన్ కొత్త రికార్డ్ క్రియేట్ చేశాడు. కాగా, ఈ మ్యాచ్‌లో భారత్ 2 పరుగుల తేడాతో విజయం సాధించింది. టీమ్ఇండియా నిర్దేశించిన 163 పరుగుల లక్ష్యాన్ని ఛేదించలేక 2 పరుగుల దూరంలో నిలిచిపోయింది. చివరి ఓవర్లో విజయానికి లంకకు 13 పరుగులు అవసరం కాగా.. ఆ ఓవర్ బౌలింగ్ చేసిన అక్షర్ పటేల్ 10 పరుగులే ఇచ్చి మంచి ప్రదర్శన చేశాడు.
ఇదీ చూడండి: 'టెస్టుల్లోకి వచ్చేది అప్పుడే'.. హార్దిక్ ఆసక్తికర సమాధానం!
