క్రికెట్ దిగ్గజం సచిన్ తెందూల్కర్ను భవిష్యత్లో సీఎంగా చూడాలని ఆశ పడుతున్నాడు మహారాష్ట్ర పుణెకి చెందిన ఓ ఐస్క్రీం వ్యాపారి. అంతేకాకుండా సచిన్ను ముఖ్యమంత్రిగా చూడాలని వినూత్నంగా ప్రచారాన్ని కూడా ప్రారంభించాడు. ఇందుకోసం తాను వ్యాపారం చేస్తున్న స్థలాన్నే ఎంచుకున్నాడు. ఇంతకీ ఇతడికి ఎందుకీ ఆలోచన వచ్చిందో ఇప్పుడు చూద్దాం.
పుణెలోని ఎరవాడ ప్రాంతానికి చెందిన వినోద్ మోరే కుటుంబంతో కలిసి 30 సంవత్సరాలుగా ఐస్క్రీం వ్యాపారం చేస్తున్నాడు. అయితే, వినోద్కు.. సచిన్ తెందూల్కర్ను మహారాష్ట్రకు కాబోయే ముఖ్యమంత్రిగా చూడాలని ఆశ. ఇందుకోసం బహిరంగ ప్రచారాన్ని కూడా ప్రారంభించాడు. దీంట్లో భాగంగానే తన దుకాణం రూపురేఖలను పూర్తిగా మార్చేశాడు. ఇతడి షాప్ను చూస్తే.. ఇది ఐస్క్రీం దుకాణమా లేదా సచిన్ ఫొటో మ్యూజియమా అనిపించక మానదు. అంతలా తన దుకాణాన్ని సచిన్ బ్యానర్లు, ఫ్లెక్సీలతో నింపేశాడు. తన షాప్ చుట్టూ సచిన్ ఫొటోలే కాకుండా సచిన్ సీఎం కావాలని చేపట్టిన బహిరంగ ప్రచారాల్లో పాల్గొన్న వ్యక్తుల ఫొటోలను కూడా అతికించాడు. అలాగే ఈ ప్రచారానికి సంబంధించి తన కస్టమర్లు ఏమనుకుంటున్నారో తెలుసుకోవడానికి ప్రత్యేకంగా ఓ డైరీని కూడా అందుబాటులో ఉంచాడు. ఇందులో భిన్న రకాల అభిప్రాయాలను చూడవచ్చు.
ఇలా మొదలైంది ఈ ప్రచారం..
మహారాష్ట్రలో 2019 తర్వాత ప్రభుత్వాలు మారాయి. రాష్ట్రంలో నెలకొన్న పొలిటికల్ డ్రామాతో ఏ రాజకీయ పార్టీ కూడా ప్రజలు వేసిన విలువైన ఓట్లను పరిగణలోకి తీసుకోవడం లేదని భావించాడు వినోద్ మోరే. ఈ కారణంగానే భవిష్యత్లో రాష్ట్ర ప్రయోజనాలను దృష్టిలో ఉంచుకొని పాలన చేసే నాయకుడే ముఖ్యమంత్రిగా రావాలని.. ఆ సత్తా కేవలం ఒక్క క్రికెటర్ సచిన్కి మాత్రమే ఉందని అంటున్నాడు వినోద్. ఇందుకోసమే ఐదు నెలల క్రితమే సచిన్ తెందూల్కర్ కాబోయే ముఖ్యమంత్రి అనే ప్రచారాన్ని ప్రారంభించాడు వినోద్ మోరే.
"నా షాప్ చుట్టూ సచిన్ ఫొటోలను ఉంచినప్పుడు.. ఆయనే కాబోయే ముఖ్యమంత్రి అని ప్రచారం చేస్తున్నప్పుడు అందరూ నన్ను చూసి నవ్వారు. అయితే క్రికెట్‌లో సచిన్ తెందూల్కర్ ప్రదర్శించిన ప్రతిభ నేడు దేశం పేరును ప్రపంచానికి చాటిచెప్పింది. ఇది ప్రజలందరికీ తెలుసు. ఇదే విధంగా రాష్ట్రంలో సచిన్ ముఖ్యమంత్రి ఐతే రాష్ట్ర రూపురేఖలను కచ్చితంగా మార్చగలడు. నేను చేపట్టిన ఈ ప్రచారం గురించి నా కస్టమర్లు అడగడం ప్రారంభించారు. క్రమంగా సచిన్పై ఉన్న అభిమానంతో వారు కూడా ఈ ప్రచారంలో భాగస్వాములయ్యారు. రాష్ట్రాన్ని అభివృద్ధి చేసే నాయకుడు సచిన్ తెందూల్కర్ ఒక్కడనే అని వీరు కూడా అభిప్రాయపడ్డారు. ప్రచారం ప్రారంభించిన ఈ ఐదు నెలల్లో దాదాపు 1500 మంది ఫొటోలు దిగి క్యాంపెయిన్లో పాల్గొన్నారు."
- వినోద్ మోరే, సచిన్ తెందూల్కర్ వీరాభిమాని
సచిన్ కోసం షాప్ పేరునే మార్చాడు..
తనకిష్టమైన సచిన్ మాస్ క్యాంపెయిన్ కోసం ఎన్నో ఏళ్లుగా ఉన్న తన షాప్ పేరునే మార్చాడు వినోద్. దీనికి 'సచిన్ మలై' అనే పేరు పెట్టినట్లు మోరే తెలిపాడు. ఈ ప్రచారం కారణంగానే పుణె నగరంలోని 'మాన్సీ మలై ఐస్ గోలా' అనే మా దుకాణం ప్రసిద్ధి చెందిందని చెబుతున్నాడు మోర్. నగరం నలుమూలల నుంచి ప్రజలు వినోద్ షాప్నకు వెళ్తుంటారు. ఇక్కడ రూ.50 నుంచి రూ.500 వరకు అనేక వెరైటీల ఐస్క్రీంలు అందుబాటులో ఉంటాయి.
"చాలా కాలం నుంచి నేను క్రికెట్ చూస్తున్నాను. అప్పటి నుంచే సచిన్ తెందూల్కర్కు నేను వీరాభిమానిని. ఈయన ఆడే మ్యాచ్లు చూసేందుకు మా షాప్లో ప్రత్యేకంగా టీవీని కూడా ఏర్పాటు చేశాను. నేనెప్పుడూ వారిని(సచిన్)ను కలవలేదు. కానీ ఈ క్యాంపెయిన్ ద్వారానైనా సచిన్ను కలవాలనుకుంటున్నాను. ఆయన్ను కలిశాక.. తనని ముఖ్యమంత్రిగా చూడాలన్న నా కోరిక గురించి కూడా ఆయనకు చెప్పాలని ఉంది." అని వినోద్ మోరే తెలిపాడు.
