ఐపీఎల్.. బీసీసీఐకి వేలకోట్ల రూపాయలు తెచ్చిపెట్టే ఆదాయవనరు. ప్రతి ఏడాది వేసవిలో మన దేశంలో జరిగే ఈ టోర్నీ కోసం విదేశీ క్రికెటర్లతో పాటు దేశవాళీ ఆటగాళ్లు ఎంతో ఆసక్తిగా ఎదురుచూస్తుంటారు. అదృష్టం బాగుంటే ఒక్క సీజన్తో స్టార్లు అయిపోతారు. అలాంటిది ఈ సీజన్లో పలువురు ఆటగాళ్లు వైరస్ బారిన పడటం వల్ల ఎప్పుడూ లేనిది లీగ్ నిరవధిక వాయిదా పడింది.
కొవిడ్ సెకండ్ వేవ్ ప్రభావంతో దేశంలో ఓవైపు మనుషులు చనిపోతుంటే, లీగ్ నిర్వహించడమేంటి? అని కొందరు అభిప్రాయం వ్యక్తం చేస్తున్నారు. బీసీసీఐ మాత్రం మిగిలిన మ్యాచ్ల్ని ఈ ఏడాదే కచ్చితంగా నిర్వహిస్తామనే పట్టుదలతో ఉంది.
గతేడాది సెప్టెంబరు నుంచి నవంబరు మధ్య యూఏఈ వేదికగా బీసీసీఐ, ఐపీఎల్ 13వ సీజన్ నిర్వహించింది. అది జరిగిన నాలుగు నెలల తర్వాత, అంటే ఏప్రిల్ 9 నుంచి కొత్త సీజన్ను స్వదేశంలో ప్రారంభించింది. సరిగ్గా అదే సమయంలో భారత్లో కరోనా సెకండ్ వేవ్ మొదలవడం, వైరస్ ప్రభావంతో పదుల సంఖ్యలో ప్రజలు మరణించారు. అలాంటి సమయంలోనూ ప్రేక్షకులు లేకుండానే మ్యాచ్లు విజయవంతంగా జరిగాయి.
ఆ కారణం వల్లే సీజన్ వాయిదా!
సీజన్లోని 31 మ్యాచ్లు బాగానే జరిగాయి. అయితే దిల్లీ, అహ్మదాబాద్ చేరుకున్న తర్వాత కోల్కతా, చెన్నై, దిల్లీ, హైదరాబాద్ జట్లలోని పలువురు ఆటగాళ్లు కరోనా బారిన పడ్డారు. అప్పుడు తొలుత మ్యాచ్ల్ని వాయిదా వేశారు. వైరస్ ప్రభావం ఎక్కువగా ఉండటం వల్ల మొత్తం సీజన్ను వాయిదా వేసినట్లు బోర్డు వెల్లడించింది.
రద్దయితే బీసీసీఐకి భారీ నష్టం!
ప్రస్తుత పరిస్థితుల్లో ఐపీఎల్ కచ్చితంగా జరుపుతామని బీసీసీఐ చెప్పడానికి కారణం దాని ద్వారా వచ్చే ఆదాయం. ఒకవేళ ఈ సీజన్ రద్దయితే దాదాపు రూ.2500 కోట్లు కోల్పోయే అవకాశముంది. ఇప్పటికే కరోనా కారణంగా దేశవాళీ మ్యాచ్లు, స్వదేశంలో సిరీస్లు లేక బోర్డు చాలా నష్టపోయింది. ఈ సీజన్ కూడా జరగకపోతే అంతే సంగతులు!
ఎస్జీఎమ్ మీటింగ్తో రానున్న క్లారిటీ
బీసీసీఐ అధ్యక్షుడు గంగూలీ, సెక్రటరీ జైషా, ఐపీఎల్ పాలకమండలి అధ్యక్షుడు బ్రిజేశ్ పటేల్.. మే 29న స్పెషల్ జనరల్ మీటింగ్లో(ఎస్జీఎమ్) ఐపీఎల్ మిగిలిన మ్యాచ్లు, దేశవాళీ సీజన్ గురించి చర్చించనున్నట్లు తెలుస్తోంది. తద్వారా వీటిపై పూర్తి స్పష్టత వచ్చే అవకాశముంది.
మ్యాచ్లపై బోర్డు సందిగ్ధత
మిగిలిన ఐపీఎల్ మ్యాచ్ల్ని ఎప్పుడు, ఎక్కడ జరపాలో బోర్డు నిర్ణయం తీసుకోలేకపోతోంది. ప్రపంచ టెస్టు ఛాంపియన్షిప్ ఫైనల్ కోసం త్వరలో ఇంగ్లాండ్ వెళ్లనున్న టీమ్ఇండియా.. ఆ తర్వాత ఇంగ్లీష్ జట్టుతో ఐదు టెస్టుల సిరీస్ ఆడతుంది. అనంతరం టీ20 ప్రపంచకప్ కోసం స్వదేశానికి వస్తుంది. కోహ్లీసేనకు ఇంత పకడ్బందీ షెడ్యూల్ ఉండటం వల్ల ఐపీఎల్ మ్యాచ్ల్ని ఎప్పుడు జరపాలో బోర్డుకు అర్థం కావట్లేదు.
మిగతా సీజన్ అప్పుడేనా?
టీ20 ప్రపంచకప్ తర్వాత దక్షిణాఫ్రికా మన దేశానికి రావాల్సి ఉంది. ఇప్పుడు ఆ పర్యటనను రద్దు చేసి, ఆ స్థానంలో ఐపీఎల్ మిగిలిన మ్యాచ్ల్ని జరపాలని బీసీసీఐ భావిస్తోంది. మరి ఏం జరుగుతుందో చూడాలి.
