షార్జా వేదికగా జరిగిన మ్యాచ్లో కోల్కతా నైట్ రైడర్స్పై దిల్లీ క్యాపిటల్స్ 18 పరుగులు తేడాతో గెలిచింది. 229 పరుగల లక్ష్యంతో బరిలో దిగిన కోల్కతా 8 వికెట్లు కోల్పోయి 210కే పరిమితమైంది. నితీశ్‌ రాణా(58: 35 బంతుల్లో 4ఫోర్లు, 4సిక్సర్లు) అర్ధశతకంతో రాణించగా.. ఆఖర్లో ఇయాన్‌ మోర్గాన్‌(44 :18 బంతుల్లో ఒక ఫోర్‌, 5సిక్సర్లు), రాహుల్ త్రిపాఠి(36: 16 బంతుల్లో 3ఫోర్లు, 3సిక్సర్లు) మెరుపులు మెరిపించినా గెలిపించలేకపోయారు. బౌలర్లు నోర్ట్జే(3/33), హర్షల్‌ పటేల్(2/34) సహకరించడం వల్ల దిల్లీ విజయాన్ని అందుకుంది. మిగతా బౌలర్లు కగిసొ రబడా, అమిత్ మిశ్రా, స్టొయినిస్ తలో వికెట్ తీశారు. దిల్లీ విజయంలో సారథిశ్రేయస్‌ అయ్యర్‌ (88), పృథ్వీ షా(66), పంత్(38) కీలక పాత్ర పోషించారు.
భారీ ఛేదనకు దిగిన కోల్‌కతాకు ఆదిలోనే గట్టి దెబ్బ తగిలింది. ఓపెనర్‌ సునీల్‌ నరైన్‌(3) మరోసారి నిరాశపరిచాడు. తర్వాత శుభ్‌మన్‌ గిల్‌(28), నితీశ్‌ రాణా(58) రాణించడం వల్ల ఇన్నింగ్స్‌ గాడిలో పడింది. ఈ క్రమంలోనే వారిద్దరూ స్వల్ప వ్యవధిలో ఔటయ్యారు. ఆపై రసెల్‌(13), దినేశ్‌ కార్తీక్‌(6) సైతం విఫలమయ్యారు. ఈ క్రమంలో జోడీ కట్టిన మోర్గాన్‌, రాహుల్ మెరుపు బ్యాటింగ్ చేశారు. వీరిద్దరూ చివర్లో ఆకాశమే హద్దుగా చెలరేగారు. వరుస సిక్సర్లతో దిల్లీని బెంబేలెత్తించారు. దీంతో కోల్కతా విజయం ఖాయమనుకున్న సమయంలో దిల్లీ బౌలర్లు మళ్లీ మెరిశారు. కీలక సమయంలో మోర్గాన్‌, రాహుల్ను పెవిలియన్కు చేర్చారు. దీంతో శ్రేయస్‌ జట్టు గెలుపొందింది.
అంతకముందు టాస్‌ ఓడి బ్యాటింగ్‌కు దిగిన దిల్లీ నిర్ణీత 20 ఓవర్లలో నాలుగు వికెట్ల నష్టానికి 228 పరుగుల భారీ స్కోర్‌ చేసింది. కెప్టెన్‌ శ్రేయస్‌ అయ్యర్‌ (88 నాటౌట్‌; 38 బంతుల్లో 7x4, 6x6) మెరుపు బ్యాటింగ్, ఓపెనర్‌ పృథ్వీషా (66; 41 బంతుల్లో 4x4, 4x6), రిషభ్‌ పంత్ (38; 17 బంతుల్లో 5x4, 1x6) అద్భుతంగా రాణించడం వల్ల కోల్కతా ముందు దిల్లీ భారీ లక్ష్యాన్ని ఉంచింది. రసెల్‌ 2 వికెట్లు తీయగా వరుణ్‌, నాగర్‌కోటి చెరో వికెట్ పడగొట్టారు.
