కింగ్స్ ఎలెవన్ పంజాబ్తో జరిగిన మ్యాచ్లో రాయల్ ఛాలెంజర్స్ బెంగళూరు కెప్టెన్ విరాట్ కోహ్లీ రెండు విలువైన క్యాచ్లు జారవిరచడంపై అనేక విమర్శలు వెల్లువెత్తాయి. ఈ క్రమంలోనే కోహ్లీ చిన్ననాటి కోచ్ రాజ్కుమార్ శర్మ స్పందించారు. కేవలం రెండు మ్యాచ్లు చూసి అతడిపై ఓ నిర్ణయానికి రావడం సరికాదని అభిప్రాయపడ్డారు.
"ప్రతి ఒక్క ఆటగాడి జీవితంలో ఇది ఒక భాగం. మైదానంలో అందరికీ మంచిరోజులూ, చెడ్డరోజులూ ఉంటాయి. కోహ్లీ మనలాగే మాములు మనిషే.. యంత్రం కాదు. అతనిలో ఏమైనా నైపుణ్యం లోపించిందా అని కొంతమంది అడుగుతున్నారు. నేను మళ్లీ చెబుతున్నా.. ఓటమి ఆటలో ఒక భాగం. ప్రతి సారీ విజయం వరించాలంటే ఎప్పటికీ సాధ్యం కాదు. కోహ్లీ నిలకడగా ఆడటాన్ని అతడి అభిమానులు అలవాటు చేసుకున్నారు. కాబట్టి ఏ ఒక్క ఇన్నింగ్స్లో సరిగా ఆడకపోయినా వారు నిరాశచెందుతారు."
-రాజ్కుమార్ శర్మ, కోహ్లీ చిన్ననాటి కోచ్
గత మ్యాచ్లో కోహ్లీ క్యాచ్లను మిస్ చేయడం వల్ల.. పంజాబ్ కెప్టెన్ కేఎల్ రాహుల్ విన్నింగ్ సెంచరీతో విరుచుకుపడ్డాడు. ఈ క్రమంలోనే ఆరునెలలుగా పిచ్కు దూరంగా ఉండటం వల్ల.. విరాట్ అసహనానికి గురవుతున్నాడా అని అడగ్గా.. " ప్రతి ఒక్కరూ క్యాచ్లు మిస్ చేస్తారు. గతంలోనే అనేక మంది దిగ్గజ క్రికెటర్లు ఈ తప్పులు చేసినవారే. కాబట్టి లాక్డౌన్ ప్రభావం ఎంతమాత్రం లేదు. కోహ్లీ తిరిగి పుంజుకోవడానికి, జట్టును ముందుండి నడిపించడానికి బాగానే కష్టపడ్డాడు" అని రాజ్కుమార్ పేర్కొన్నారు.
