దినేశ్ కార్తిక్ కెప్టెన్సీ బాగుందని అంటున్నాడు కోల్కతా నైట్ రైడర్స్ బ్యాట్స్మన్ ఇయాన్ మోర్గాన్. 'ఇంగ్లాండ్కు ప్రపంచకప్ తెచ్చిన కెప్టెన్గా మీకున్న అనుభవానికి దినేశ్ కార్తిక్ మిమ్మల్ని సలహాలు అడుగుతాడా?' అన్న ప్రశ్నకు మోర్గాన్ ఈ విధంగా సమాధానమిచ్చాడు.
"దినేశ్ కార్తిక్ కెప్టెన్సీ ఇప్పటివరకు బాగా పనిచేసిందని నేను భావిస్తున్నా. అదే విధంగా డీకేతో పాటు కోచ్ బ్రెండన్ మెక్కలమ్ సారథ్యంలో జట్టు సరైన బాటలో నడుస్తుందని అనుకుంటున్నా. మా జట్టులో చాలా మంది సీనియర్ ఆటగాళ్లు ఉన్నారు. వారు కూడా జట్టు కోసం సలహాలు, సూచనలు ఇస్తుంటారు. కానీ వారి బాధ్యతలకు ఓ పేరు పెట్టలేం."
- ఇయాన్ మోర్గాన్, కోల్కతా నైట్రైడర్స్ బ్యాట్స్మన్
డ్రెస్సింగ్ రూమ్లో వివిధ భాషలు, నేపథ్యాలు, సంస్కృతుల ఆటగాళ్లతో కలిసి ఆడటాన్ని చాలా బాగా ఆస్వాదిస్తున్నానని మోర్గాన్ అన్నాడు. జట్టులోని ఇతర ఆటగాళ్లతో తనకు అపురూప జ్ఞాపకాలు ఉన్నాయని తెలిపాడు. కేకేఆర్ బ్యాటింగ్ గురించి ప్రస్తావించగా.. మిడిల్ ఆర్డర్ చాలా బాగుందని చెప్పాడు. ఆడే ప్రత్యర్థిని బట్టి బ్యాటింగ్ ఆర్డర్లో మార్పులు చేస్తామని మోర్గాన్ వెల్లడించాడు.
ప్రస్తుత ఐపీఎల్లో మూడు విజయాలను నమోదు చేసుకున్న కోల్కతా నైట్రైడర్స్ జట్టు పాయింట్ల పట్టికలో నాలుగో స్థానంలో ఉంది.
