క్రీజులోకి రావడం.. ఆఫ్స్టంప్ అవతల పడిన బంతిని వెంటాడి మరీ షాట్కు ప్రయత్నించడం.. అది కాస్తా ఎడ్జ్ తీసుకుని స్లిప్లో ఫీల్డర్కు వెళ్లడం.. తక్కువ స్కోరుకే వెనుదిరగడం.. 2014 ఇంగ్లాండ్ పర్యటనలో విరాట్ కోహ్లీ పరిస్థితి ఇది. అందులో నుంచి పాఠాలు నేర్చుకున్న విరాట్ 2018లో ఆ లోపాన్ని అధిగమించి సత్తాచాటాడు. తాను ప్రపంచంలోనే అత్యుత్తమ బ్యాట్స్మన్ అని నిరూపించుకున్నాడు. కానీ 2021లో కథ మళ్లీ మొదటికి వచ్చినట్లు కనిపిస్తోంది. రెండు మ్యాచ్ల్లో.. రెండు సార్లు విరాట్ ఔటైన తీరు.. 2014 టెస్టు మ్యాచ్లను తలపిస్తోంది. ఇది అభిమానులను కలవరపెడుతోంది. అయితే 2018, 2021 మధ్య విరాట్ బ్యాటింగ్లో మార్పులు కనిపిస్తుండటమే ఇందుకు కారణం అంటున్నాడు టీమ్ఇండియా మాజీ క్రికెటర్ వీవీఎస్ లక్ష్మణ్.
ఆఫ్స్టంప్ తిప్పలు..
తొలి టెస్టులో దారుణంగా విఫలమైన కోహ్లీ(0), రెండో టెస్టులో 42 పరుగులు చేసి ఔటయ్యాడు. క్రీజులో ఉన్నంత సేపు ఇబ్బంది పడుతున్నట్లే కనిపించాడు. ఇక రెండు మ్యాచుల్లోనూ ఔటైన తీరు కూడా ఒకటే. అయితే క్రీజులో.. ఆఫ్ స్టంప్ అవతల కోహ్లీ ఎక్కువ కదులుతుండటమే ఇందుకు కారణం అంటున్నాడు లక్ష్మణ్.
"ఇంగ్లాండ్ బౌలర్లు క్రమశిక్షణతో బౌలింగ్ వేశారు. లైన్ అండ్ లెన్త్తో తిప్పలు పెట్టారు. ఆఫ్స్టంప్ అవతల వేస్తే కోహ్లీ చిక్కుతాడని వాళ్లకి తెలుసు. అక్కడ బంతులేస్తే కోహ్లీకి ఇష్టం లేదని కూడా తెలుసు. ఒక్కోసారి.. బంతి లోపలికి వచ్చి ప్యాడ్లను తాకే విధంగా, ఇంకోసారి బౌన్సర్లు వేస్తూ విరాట్ను ఇబ్బందికి గురిచేశారు. క్రీజులో విరాట్ ఎక్కువగా కదులుతుండటం నేను గమనించా. 2018లో ఇలా జరగలేదు. అందుకే తనదైన శైలిలో విరాట్ షాట్లు ఆడలేకపోతున్నాడు. ఆఫ్స్టంప్ అవతల పడే బంతులను వదిలేయాలని ముందుగానే లోలోపాల నిశ్చయించుకున్నాడు. కట్టుదిట్టమైన బౌలింగ్కు, విరాట్ క్రీజులో ఎక్కువ కదులుతుండటం బౌలర్లకు కలిసివచ్చింది."
-లక్ష్మణ్, టీమ్ఇండియా మాజీ క్రికెటర్.
విరాట్ కోహ్లీ ఆటను కే.ఎల్ రాహుల్తో పోల్చాడు లక్ష్మణ్.
"2018లో విరాట్ ఎలా ఆడాడో.. రాహుల్ ఇప్పుడు అలా ఆడుతున్నాడు. రెండు టెస్టుల్లో మంచి ప్రదర్శన చేశాడు. క్రీజులో కదలికలపై విరాట్ దృష్టి సారిస్తే.. తనదైన శైలిలో మంచి షాట్లు ఆడగలడు. ప్రస్తుతానికైతే.. కోహ్లీ అలా కదులుతుంటే లెగ్ స్టంప్ కూడా కనిపిస్తోంది."
-లక్ష్మణ్, టీమ్ఇండియా మాజీ క్రికెటర్.
లార్డ్స్ వేదికగా జరుగుతున్న రెండో టెస్టులో టాస్ ఓడి బ్యాటింగ్కు దిగిన కోహ్లీసేన.. తొలి రోజు ఆట ముగిసే సమయానికి మూడు వికెట్ల నష్టానికి 276పరుగులు చేసింది. రాహుల్ 127*, రోహిత్ 83తో అదరగొట్టారు. పుజారా 9 పరుగులకే ఔటయ్యాడు. రాహుల్తో రహానే(1*) క్రీజులో ఉన్నాడు.
ఇదీ చూడండి:- 'అవును.. ప్రపంచ అత్యుత్తమ ఫీల్డర్లలో నేనూ ఒకడిని!'
