భారత్తో జరగబోయే రెండో టెస్టుకు నాలుగు మార్పులతో బరిలోకి దిగుతోంది ఇంగ్లాండ్ జట్టు. ఇప్పటికే బౌలర్ జోఫ్రా ఆర్చర్ మోచేతి గాయంతో ఆటకు దూరం కాగా.. జోస్ బట్లర్కు మిగిలిన మూడు టెస్టులకు విశ్రాంతినిచ్చింది టీమ్ యాజమాన్యం. తొలి టెస్టులో అద్భుత ప్రదర్శన చేసి జట్టు విజయంలో కీలక పాత్ర పోషించిన డామ్ బెస్, అండర్సన్లనూ తుది జట్టు నుంచి తప్పించినట్లు కెప్టెన్ జో రూట్ తెలిపాడు.
రెండో టెస్టుకు అందుబాటులో ఉండే తుది 12 మందిని ప్రకటించింది ఇంగ్లాండ్ అండ్ వేల్స్ క్రికెట్ బోర్డు. బెన్ ఫోక్స్, స్టువర్ట్ బ్రాడ్, క్రిస్ వోక్స్, మొయిన్ అలీకి చోటు కల్పించింది. చివరి రెండు టెస్టులకు పూర్తి ఫిట్గా ఉండాలనే ఉద్దేశంతో అండర్సన్ను తప్పించినట్లు పేర్కొంది. తదుపరి మూడు టెస్టులకు ఫోక్స్ వికెట్కీపర్గా ఆడతాడని కెప్టెన్ రూట్ తెలిపాడు. తుది రెండు మ్యాచ్లకు జట్టులోకి వచ్చే జానీ బెయిర్ స్టోను స్పెషలిస్టు బ్యాట్స్మెన్గా తీసుకుంటామని పేర్కొన్నాడు.
తొలి టెస్టుకు ముందు ఓపెనర్ జాక్ క్రావ్లీ గాయపడిన సంగతి తెలిసిందే. కాగా, మొదటి టెస్టులో 227 పరుగుల భారీ తేడాతో పర్యటక జట్టు విజయం సాధించింది. దీంతో టెస్టు ఛాంపియన్షిప్లో ఏకంగా 70.2 పాయింట్లతో మొదటి స్థానంలోకి దూసుకెళ్లింది రూట్ సేన. చెన్నై టెస్టు పరాభవంతో భారత్ నాలుగో స్థానానికి పడిపోయింది.
రెండో టెస్టు చెన్నై వేదికగా ఫిబ్రవరి 13 నుంచి ఎంఏ చిదంబరం స్టేడియంలో జరగనుంది.
ఇంగ్లాండ్ స్క్వాడ్: డామ్ సిబ్లీ, రోరీ బర్న్స్, డాన్ లారెన్స్, జో రూట్(కెప్టెన్), బెన్ స్టోక్స్, ఒల్లీ పోప్, బెన్ ఫోక్స్, మొయిన్ అలీ, స్టువర్ట్ బ్రాడ్, క్రిస్ వోక్స్, జాక్ లీచ్, ఒల్లీ స్టోన్.
ఇదీ చదవండి: ఒలింపిక్ నిర్వాహక కమిటీ అధ్యక్ష పదవికి మోరి రాజీనామా
