ఇంగ్లాండ్తో జరిగిన టెస్టు సిరీస్లో విజేతగా నిలిచిన కోహ్లీసేన టీ20 సిరీస్లోనూ సత్తా చాటేందుకు సిద్ధమైంది. మార్చి 12 (శుక్రవారం) నుంచి జరగనున్న ఈ సిరీస్కు అహ్మదాబాద్లోని నరేంద్ర మోదీ స్టేడియం వేదిక కానుంది. టెస్టు సిరీస్లో పరాభవాన్ని ఎదుర్కొన్న ఇంగ్లాండ్ జట్టు.. టీ20 సిరీస్నైనా చేజిక్కించుకునేందుకు ప్రణాళికలను రచిస్తోంది.
ఈ సిరీస్ రాబోయే టీ20 ప్రపంచకప్కు సన్నాహకంగా మారనుందని ఇరుజట్లు అభిప్రాయపడుతున్నాయి. ఇందులో సత్తా చాటిన ఆటగాళ్లనే ప్రపంచకప్ తుదిజట్టులో అవకాశం కల్పిస్తామని టీమ్ఇండియా బ్యాటింగ్ కోచ్ విక్రమ్ రాథోడ్ ఇటీవలే స్పష్టం చేశాడు.
టీమ్ఇండియా, ఇంగ్లాండ్ మధ్య ఇప్పటివరకు జరిగిన 14 టీ20ల్లో చెరో 7 మ్యాచ్ల్లో విజయం సాధించాయి.
ఆ రికార్డుల వివరాలు..
అయితే ఈ సిరీస్లోనే బ్యాటింగ్లో సరికొత్త రికార్డులు నమోదయ్యే అవకాశం కనిపిస్తోంది. అంతర్జాతీయ టీ20ల్లో 3వేల పరుగుల మైలురాయిని చేరుకోవడానికి.. టీమ్ఇండియా కెప్టెన్ విరాట్ కోహ్లీ మరో 72 పరుగులు చేయాల్సిఉంది. అదే విధంగా టీ20ల్లో అత్యధిక రన్స్ చేసిన రెండో బ్యాట్స్మన్ను మార్టిన్ గప్తిల్ను అధిగమించేందుకు వైస్కెప్టెన్ రోహిత్ శర్మ.. మరో 67 పరుగులు చేయాల్సిఉంది.
అంతర్జాతీయ టీ20ల్లో అత్యధిక పరుగులు చేసిన ఆటగాళ్లు..
విరాట్ కోహ్లీ - 2,928
మార్టిన్ గప్తిల్ - 2,839
రోహిత్ శర్మ - 2,773
ఆరోన్ ఫించ్ - 2,346
షోయబ్ మాలిక్ - 2,335
అంతర్జాతీయ క్రికెట్లో 12 వేల పరుగుల మైలురాయిని చేరుకోవాడానికి టీమ్ఇండియా కెప్టెన్ విరాట్ కోహ్లీ మరో 17 పరుగుల దూరంలో ఉండడం విశేషం. ఈ రికార్డును అందుకుంటే.. అత్యధిక పరుగులు చేసిన ఆటగాళ్ల జాబితాలో మూడో బ్యాట్స్మన్గా కోహ్లీ నిలుస్తాడు. ఇందులో ఆస్ట్రేలియా మాజీ కెప్టెన్ రికీ పాంటింగ్ (15,440) అగ్రస్థానంలో ఉండగా.. గ్రేమ్ స్మిత్ (14,878) రెండో స్థానంలో నిలిచాడు. అయితే ఈ రికార్డులన్నీ ఇంగ్లాండ్తో జరగనున్న సిరీస్లో నమోదయ్యే అవకాశం ఉంది.
ఇదీ చూడండి: పృథ్వీ షా రికార్డ్- హజారే టోర్నీలో మరో శతకం
