ముంబయిలో కరోనా ఆంక్షల పట్ల భారత మాజీ ఆటగాడు సురేశ్ రైనాకు అవగాహన లేదని అతడి మేనేజ్మెంట్ టీమ్ తెలిపింది. నిబంధనల గురించి తెలిసేలోపే అరెస్టు జరిగిపోయిందని వివరించింది.
"సురేశ్ రైనా ఓ షూటింగ్ కోసం ముంబయికి వెళ్లాడు. ఆ షూట్ లేటుగా ముగిసింది. తిరిగి దిల్లీ వెళ్లే సమయంలో ఒక స్నేహితుడు డిన్నర్ కోసం ఆ క్లబ్‌కు రావాలని రైనాను ఆహ్వానించాడు. అక్కడి టైమింగ్స్, కొత్త నిబంధనల గురించి రైనాకు తెలియదు. అతనెప్పుడూ ప్రభుత్వ నిబంధనలకు లోబడే వ్యవహరిస్తాడు. భవిష్యత్తులోనూ అలాగే ఉంటాడు."
-- సురేశ్ రైనా మేనేజ్మెంట్ టీమ్
సోమవారం అర్ధరాత్రి ముంబయిలోని ఎయిర్‌పోర్ట్ సమీపంలో డ్రాగన్‌ప్లై క్లబ్‌లో రైనా, సింగర్ గురు రంధవతో పాటు మొత్తం 34 మందిని ముంబయి పోలీసులు అదుపులోకి తీసుకున్నారు. కొవిడ్-19 వ్యాప్తిని అడ్డుకునేందుకు రాత్రి సమయాల్లో మున్సిపల్, కార్పొరేషన్ ప్రాంతాల్లో కర్ఫ్యూ విధిస్తున్నట్లు మహారాష్ట్ర ప్రభుత్వం సోమవారం ప్రకటించింది. దీని గురించి తెలియని రైనా నిబంధనలను ఉల్లంఘించాడు. దీంతో అక్కడి పోలీసులు అతడిని అరెస్టు చేశారు. అనంతరం బెయిల్పై విడుదల చేశారు.
ఇదీ చూడండి: 'భజ్జీ ఔట్ చేశాడు.. టెక్నిక్పై నమ్మకం పోయింది'
