భారత్లో రోజురోజుకూ పెరుగుతున్న కరోనా కేసుల కారణంగా ఇటీవలే ఐపీఎల్ను నిరవధిక వాయిదా వేశారు. ఈ క్రమంలోనే లీగ్ను యూఏఈలో నిర్వహించనున్నట్లు ఊహాగానాలు వినిపించాయి. తాజాగా, ఈ విషయంపై దుబాయ్ స్పోర్ట్స్ సిటీస్ క్రికెట్ అండ్ ఈవెంట్స్ హెడ్ సల్మాన్ హనీఫ్ స్పందించారు. ఇటువంటి పోటీలకు అన్ని సదుపాయాలు కల్పించేందుకు సిద్ధంగా ఉన్నట్లు పేర్కొన్నారు.
''ఒకవేళ తక్కువ వ్యవధిలో ఎక్కువ మ్యాచ్లను నిర్వహించాలని అనుకుంటే స్టేడియంలో చాలినన్ని వికెట్ పిచ్ల సదుపాయం ఉంది. అంతే కాకుండా, పిచ్ను తాజాగా ఉంచేందుకు ఈ వ్యవధిలో ఎలాంటి మ్యాచ్లను నిర్వహించం.''
- సల్మాన్ హనీఫ్
ఆస్ట్రేలియాలో జరగాల్సిన టీ20 ప్రపంచకప్ నిర్వహణపై ఆనిశ్చితి నెలకొన్న నేపథ్యంలో.. ఐపీఎల్ను సెప్టెంబర్- అక్టోబర్ మధ్య జరపాలని అధికారులు భావిస్తున్నారు. ఐపీఎల్ను విదేశాలకు తీసుకెళ్లాల్సి వచ్చినప్పటికీ.. ఈ ఏడాది లీగ్ జరిగేలా చూడాలని బీసీసీఐ అధ్యక్షుడు గంగూలీ పలు సందర్భాల్లో పునరుద్ఘాటించారు.
మరోవైపు వచ్చే వారం నాటికి టీ 20 ప్రపంచ కప్ నిర్వహణపై ఐసీసీ ఓ నిర్ణయానికి వచ్చే అవకాశాలు కనిపిస్తున్నాయి. ఒకవేళ అనుకున్నట్లుగా సెప్టెంబరులో ఐపీఎల్కు షెడ్యూల్ కుదిరితే.. ఫ్రాంచైజీలు తమ ఆటగాళ్లకు ప్రాక్టీస్ కోసం కొంచెం ముందుగానే స్టేడియాలకు చేరుకునే అవకాశాలు కనిపిస్తున్నాయి. లీగ్ ఎక్కడ జరుగుతుందనేది ఇంకా స్పష్టత లేదు.
లాక్డౌన్ కారణంగా దాదాపు 6 నెలల నుంచి టీమిండియా క్రికెటర్లు ఇళ్లకే పరిమితం అయ్యారు. ఇటీవలే కొంత మంది సొంతంగా నెట్ ప్రాక్టీసు ప్రారంభించారు.
ఇదీ చూడండి:ట్రైనింగ్ ఇస్తే ఇప్పుడూ క్రికెట్ ఆడేస్తా: గంగూలీ
