ఐపీఎల్ కోసం యూఏఈకి వెళ్లిన చెన్నై సూపర్ కింగ్స్ ఫ్రాంచైజీకి దెబ్బ మీద దెబ్బ తగులుతోంది. ఇప్పటికే ఆ జట్టుకు చెందిన ఇద్దరు ఆటగాళ్లు, 11 మంది సిబ్బందికి కరోనా నిర్ధరణ అయింది. అలాగే జట్టు ప్రధాన ఆల్రౌండర్ సురేశ్ రైనా ఈ ఏడాది లీగ్ నుంచి వ్యక్తిగత కారణాలతో తప్పుకున్నాడు. దీనిపై యాజమాన్యం సీరియస్గా ఉన్నట్లు తెలుస్తోంది. వచ్చే ఏడాది ఏప్రిల్లో జరిగే తర్వాత సీజన్ కంటే ముందే ఇతడితో తెగదెంపులు చేసుకోవాలని భావిస్తోందట.
"సీఎస్కే సారథి ధోనీ, కోచ్, మేనేజర్లకు సూట్స్ ఇచ్చాం. అలాగే రైనాకు కూాడా సూట్ లభించేది. కానీ గదికి బాల్కనీ లేకపోవడం వల్ల అతడు అసంతృప్తి చెందాడు."
-ఐపీఎల్ సోర్స్
అయితే ఈ పరిస్థితి చూస్తుంటే ఈ సీజన్కే కాక రైనా తదుపరి సీజన్కు కూడా దూరమయ్యే అవకాశం ఉన్నట్లు తెలిపారు ఓ అధికారి. దీంతో అతడు మళ్లీ సీఎస్కే జెర్సీ ధరించే అవకాశం లేదని తెలుస్తోంది.
"ఓ సీనియర్ క్రికెటర్, అంతర్జాతీయ క్రికెట్ నుంచి రిటైరై చాలా కాలంగా క్రికెట్ దూరంగా ఉండి జట్టులోకి రావడం కష్టమే. మళ్లీ అతడు వేలంలో అందుబాటులోకి వస్తే ఎవరైనా అతడిని తీసుకోవచ్చు" అని ఓ అధికారి తెలిపారు.
ప్రస్తుతం సీఎస్కే.. యువ ఆటగాడు రుతురాజ్ గైక్వాడ్ను సిద్ధం చేసే పనిలో పడింది. అతడు త్వరలోనే కరోనా నుంచి కోలుకుని ట్రైనింగ్ సెషల్లో పాల్గొంటాడని జట్టు భావిస్తోంది.
రైనా ప్రస్తుతం సీఎస్కే తరఫున అత్యధిక పరుగులు (4527) సాధించిన బ్యాట్స్మన్గా ఉన్నాడు. అలాగే లీగ్లో ఎక్కువ పరుగులు (5368) చేసిన బ్యాట్స్మెన్లో విరాట్ కోహ్లీ (5412) తర్వాత రెండో స్థానంలో కొనసాగుతున్నాడు.
