ఐపీఎల్ బ్రాడ్కాస్టింగ్ రైట్స్ (ipl broadcasting rights) ద్వారా బీసీసీఐకి రెట్టింపు ఆదాయం రానుంది. వచ్చే ఐదేళ్ల కాలవ్వవధికి (2023-2027)కి దాదాపు రూ.36,000 కోట్లు అర్జించనుంది. లీగ్లోకి రెండు కొత్త జట్లు ఎంట్రీ ఇవ్వనున్న నేపథ్యంలో వీటి బిడ్డింగ్ ద్వారా అధిక మొత్తమే రానున్నట్లు సమాచారం.
ప్రస్తుతం(2018-2022) ఐపీఎల్ బ్రాడ్కాస్టింగ్ రైట్స్ స్టార్ ఇండియా కలిగి ఉంది. దీని విలువ రూ.16,347 కోట్లు. కానీ రాబోయే కాలానికి ఆ విలువ కాస్త రెట్టింపు కంటే ఎక్కువగానే ఉంటుందని సంబంధిత వర్గాల సమాచారం. అదీగాక ఈసారి రెండు కొత్త టీమ్లో ఐపీఎల్లో వస్తున్నాయి. దీని బిడ్డింగ్ విలువ రూ.7,000 నుంచి రూ.10,000 కోట్ల వరకు పలుకనుంది. వీటి చేరికతో ఆడే మ్యాచ్ల సంఖ్య 74కు చేరనుంది. దీని కారణంగా బ్రాడ్కాస్టింగ్ విలువ కూడా పెరుగుతుందని ఓ అధికారి వెల్లడించారు. అమెరికా ఆధారిత సంస్థ కూడా బ్రాడ్కాస్టింగ్ రైట్స్ కోసం ఆసక్తి చూపుతున్నట్లు పేర్కొన్నారు.
టీవీ, డిజిటల్ స్ట్రీమింగ్, రేడియో, సోషల్ మీడియా.. ఇలా వివిధ బ్రాడ్కాస్టింగ్ డీల్స్ను (BCCI broadcasting rights) బీసీసీఐ కలిగి ఉంటుంది. వీటి బ్రాడ్కాస్టింగ్ రైట్స్ టెండర్ను అక్టోబర్ 25న బీసీసీఐ విడుదల చేయనుంది. అదే రోజు రెండు కొత్త ఐపీఎల్ టీమ్లను ప్రకటించనుంది. బ్రాడ్కాస్టింగ్ రైట్స్ దక్కించుకోవడానికి సోనీ, స్టార్ ఇండియా రెండూ వేలంలో ఉంటాయని తెలుస్తోంది.
అటు.. బీసీసీఐ కొత్తగా ప్రకటించిన ఐపీఎల్ జట్లను సొంతం చేసుకోవడానికి పెద్ద కార్పొరేట్ కంపెనీలు బిడ్డింగ్లో పాల్గొనున్నాయి. రాజస్థాన్ రాయల్స్ టీమ్లో 15 శాతం వాటా ఉన్న రెడ్ బర్డ్ క్యాపిటల్స్ కూడా పోటీలో ఉండనుందని సమాచారం. ఇండియన్ మాజీ క్రికెటర్ కూడా ఐపీఎల్ టీమ్ను సొంతం చేసుకోవడానికి ఆరాటపడుతున్నారట.
ఇదీ చదవండి: అవినీతి కూపంగా హెచ్సీఏ.. సుప్రీం వ్యాఖ్యలతో కొత్త ఆశలు
