తన విజయం వెనుక తల్లిదండ్రుల అంతులేని కృషి దాగుందని భారత్ టెన్నిస్ స్టార్ ప్లేయర్ సానియా మీర్జా చెప్పింది. ఒక అమ్మాయిగా ఆటను నేర్చుకోవడమే కాకుండా మహిళలపై ఉన్న వివక్షపై పోరాడాల్సి వచ్చిందని తెలిపింది. ఇటీవలే ఓ మీడియా సమావేశంలో మాట్లాడుతూ కొన్ని ఆసక్తికర విషయాలు పంచుకుంది.
ఆరేళ్ల వయసు నుంచే టెన్నిస్లో శిక్షణ తీసుకోవడం ప్రారంభించింది సానియా. హైదరాబాద్ నుంచి ఓ అమ్మాయి టెన్నిస్ ఆడుతుందని తెలియగానే చాలా మంది హేళన చేశారని గుర్తుచేసుకుందీ స్టార్ ప్లేయర్. దేశం కోసం పతకాలు సాధించడం చాలా ఆనందంగా ఉందని చెప్పింది. ఒకవేళ అబ్బాయిగా పుట్టుంటే మంచి క్రికెటర్ అయ్యుండేదానినంది.
అక్కడ ఎవ్వరూ లేరు..
హైదరాబాద్కు చెందిన టెన్నిస్ క్రీడాకారిణి సానియా మీర్జా... పాకిస్థాన్ క్రికెటర్ షోయబ్‌ మాలిక్‌ను పెళ్లాడింది. అయితే వీళ్లిద్దరికీ ఎప్పుడు, ఎక్కడ పరిచయం? ఎలా ప్రేమలో పడ్డారు? అన్నది అభిమానులకు ఇప్పటికీ ఆశ్చర్యం కలిగించే విషయం. తామిద్దరం ఎలా దగ్గరైంది చెప్పలేదు కానీ, తొలిసారి ఎక్కడ, ఎలా కలుసుకున్నది మాత్రం ఈ కార్యక్రమంలో వెల్లడించింది సానియా.
"సామాజిక మాధ్యమాల్లో మేం ఒకరికొకరం తెలుసు. నేరుగా కలుసుకున్నది మాత్రం హోబర్ట్‌ (ఆస్ట్రేలియా)లోని ఒక రెస్టారెంట్లో. సాయంత్రం 6 దాటితే అక్కడికి మనుషులు కాదు కదా.. కనీసం జంతువులు కూడా రావు. మమ్మల్ని విధే అలా కలిపిందని నేననుకున్నా. కానీ నన్ను కలవడం కోసమే షోయబ్‌ అక్కడికి ప్రణాళిక వేసుకుని వచ్చాడని తర్వాత తెలిసింది. కాబట్టి ఇందులో విధి పాత్ర ఏమీ లేదు"
-- సానియా మీర్జా, టెన్నిస్ క్రీడాకారిణి
సానియా, షోయబ్‌ల పెళ్లి 2010లో హైదరాబాద్ వేదికగా జరిగింది. వీళ్లిద్దరికీ గత ఏడాదే కొడుకు పుట్టాడు. పేరు ఇజాన్‌ మీర్జా మాలిక్‌. గర్భవతిగా ఉండటం వల్ల రెండేళ్లు ఆటకు విరామం తీసుకుంది సానియా. మళ్లీ మైదానంలో అడుగు పెట్టేందుకు ఇటీవలే కసరత్తులు మొదలు పెట్టింది. వచ్చే ఏడాది జనవరిలో జరిగే హోబర్డ్ ఇంటర్నేషనల్ టోర్నీలో రీఎంట్రీ ఇవ్వనున్నట్లు చెప్పింది. ఇప్పటివరకు భారత్ తరఫున ఆరు గ్రాండ్ స్లామ్ డబుల్స్ టైటిల్స్ను సాధించింది సానియా మీర్జా.
ఇదీ చూడండి: యూఎస్ కాంగ్రెస్లో 'కశ్మీర్'పై తీర్మానం.. ఖండించిన భారత్
