వీర మహిళలకు నటి ప్రియాంక లక్ష డాలర్లు

కరోనాకు వ్యతిరేకంగా వీరోచిత పోరాటం చేస్తున్న మహిళలకు, లక్ష డాలర్లను అందించనుంది ప్రముఖ​ నటి ప్రియాంక చోప్రా. ఈ మొత్తాన్ని, ప్రతి వారం నలుగురు చొప్పున ఎంపిక చేసి వారికి ఇవ్వనున్నట్లు తెలిపింది.

కరోనా సంక్షోభ సమయంలో వీరోచిత పోరాటం చేస్తున్న మహిళామణులకు ఆర్థిక ప్రోత్సాహం అందించేందుకు సిద్ధమైంది ప్రముఖ బాలీవుడ్​ కథానాయిక ప్రియాంక చోప్రా. ఈ మహమ్మారిపై పోరాడుతున్న వివిధ రంగాలకు చెందిన మహిళలను, ప్రతివారం నలుగురు చొప్పున ఎంపిక చేసి వారందరికీ కలిపి లక్ష డాలర్లను ఇవ్వనుంది. తొలివారం ఎంపికైన నలుగురి వివరాలను ఇన్​స్టాగ్రామ్​ ద్వారా వెల్లడించింది.

ఈ వైరస్​ వ్యాప్తి నేపథ్యంలో కుటుంబ సంక్షేమం కోసం వారికి దూరంగా ఉంటూనే వృత్తి ధర్మం నిర్వర్తిస్తున్న ఎమిలీ అనే నర్సు, కరోనా రోగులకు తోడుగా ఉంటూ ధైర్యం నూరిపోస్తున్న జో అనే ఉద్యోగిని, ఎన్​95 మాస్కులను అందించడానికి తన డబ్బుతో పాటు విలువైన సమయాన్నీ వెచ్చించిన జయ అనే మహిళ, ఫీడింగ్​ హీరోస్​ కార్యక్రమం ద్వారా వైద్య ఆరోగ్య సిబ్బందికి ఆహారం అందిస్తున్న జెన్నీ అనే మహిళకు ప్రోత్సాహక నగదును అందించనున్నట్లు ప్రకటించింది ప్రియాంక. ప్రజల ప్రాణాల కోసం అలుపెరగకుండా శ్రమిస్తున్న వారికి అండగా నిలుస్తున్న ఈ నటిపై ప్రశంసల వర్షం కురుస్తోంది.

ఇదీ చదవండిః 'పోలీసు బిడ్డగా వారికి చేతులెత్తి సెల్యూట్​ చేస్తున్నా'