ఏడు దశాబ్దాల టాలీవుడ్ చరిత్రలో ఎన్నో విజయవంతమైన చిత్రాలు రూపొందాయి. అందులో ఎన్నో జోడీలు.. సినీ ప్రేమికుల మదిలో చిరకాలం నిలిచిపోయాయి. అందులో ప్రధానంగా చిరంజీవి-శ్రీదేవి, చిరంజీవి-విజయశాంతి, నాగార్జున-టబు, వెంకటేశ్-సిమ్రాన్ జంటలు తెలుగు ప్రేక్షకులను మరింతగా అలరించాయి. మంచి కెమిస్ట్రీతో సినిమాలోని సన్నివేశాల్లో చక్కటి భావోద్వేగాలను పలికించారు. చూసే వీక్షకులకు వారు నిజంగానే ప్రేమలో పడ్డారా? అనే సందేహం వచ్చేంతలా ఆ పాత్రల్లో లీనమైపోయారు. అలాంటి కొన్ని జోడీల గురించే ఈ కథనం.
చిరంజీవి-శ్రీదేవి
మెగాస్టార్ చిరంజీవి, అందాల తార శ్రీదేవి తొలిసారి కలిసి నటించిన చిత్రం 'రాణికాసుల రంగమ్మ'. 1981లో విడుదలై ప్రేక్షకులను ఆకట్టుకుంది. దీంతో 'ఎస్పీ పరశురామ్', 'జగదేకవీరుడు అతిలోకసుందరి' లాంటి చిత్రాల్లో కలిసి నటించారు. అద్భుతంగా కెమిస్ట్రీ పండించారు. 'జగదేకవీరుడు అతిలోకసుందరి' చిత్రంలో చిరంజీవి, శ్రీదేవిల పాత్రలను ఇప్పటికీ మర్చిపోలేరంటేనే మీరు అర్ధం చేసుకోవచ్చు.
నాగార్జున - టబు
నాగార్జున, టబు కలిసి నటించిన చిత్రం 'నిన్నే పెళ్లాడతా'. కృష్ణవంశీ దర్శకత్వం వహించారు. 1996లో వచ్చిన ఈ సినిమా విశేష ప్రేక్షకాదరణ దక్కించుకోవడం సహా నాగార్జున కెరీర్లో క్లాసికల్ హిట్గా నిలిచింది. ఈ సినిమాలో నాగ్, టబు మధ్య జరిగే రొమాంటిక్ సన్నివేశాలు వీక్షకుల్ని కట్టిపడేశాయి. ఉత్తమ చలనచిత్రంగా జాతీయ అవార్డు, ఫిలింఫేర్ అవార్డులను 'నిన్నే పెళ్లాడతా' దక్కించుకుంది.
వెంకటేశ్ - సిమ్రాన్
విక్టరీ వెంకటేశ్, సిమ్రాన్ల జోడీని తెలుగు చిత్రపరిశ్రమలో అందమైన జోడీ అని అంటారు. 'కలిసుందాం రా'లో వీరిద్దరూ చేసిన అల్లరికి ప్రేక్షకులు ఫిదా అయ్యారు. వీళ్ల మధ్య రొమాంటిక్ సన్నివేశాలు అద్భుతంగా పండాయి. ఉదయ్ శంకర్ దర్శకత్వం వహించిన ఈ సినిమా ఉత్తమ చిత్రంగా జాతీయ అవార్డును గెలుచుకుంది. దీనిని 'కుచ్ తుమ్ కహో కుచ్ హమ్ కహీన్'గా హిందీలోనూ రీమేక్ చేశారు.
మహేశ్బాబు - త్రిష
మహేశ్ బాబు, త్రిష జోడీగా నటించిన చిత్రం 'అతడు'. ఇది రొమాంటిక్ సినిమా కానప్పటికీ హీరోహీరోయిన్ల మధ్య సన్నివేశాల్లో ప్రేమ అద్భుతంగా పండించారు. త్రిషను మహేశ్ టీజ్ చేసే సన్నివేశాలు.. ఇద్దరూ అసలైన బావమరదళ్లు ఏమో అనిపించాయి. మాటల మాంత్రికుడు త్రివిక్రమ్ శ్రీనివాస్ దర్శకత్వంలో తెరకెక్కిన 'అతడు'.. 2005లో ప్రేక్షకుల ముందుకొచ్చింది. ఉత్తమ చిత్రంగా సంతోషం ఫిల్మ్ అవార్డు గెలుచుకోవడం సహా మహేశ్కు ఉత్తమ నటుడిగా నంది అవార్డు వచ్చింది.
ప్రభాస్ - అనుష్క
టాలీవుడ్ అందమైన జోడీల్లో ప్రభాస్ - అనుష్క అగ్రస్థానంలో ఉంటారు. వీరిద్దరి కలిసి మొదటిసారిగా 'బిల్లా'లో నటించారు. ఆ తర్వాత వీరిద్దరి కాంబినేషన్లో వచ్చిన 'మిర్చి', 'బాహుబలి' సిరీస్ చిత్రాలతో ప్రేక్షకులను మరింతగా కట్టిపడేశారు. బహుశా సినిమాల్లో వారిద్దరి మధ్య కుదిరిన మంచి కెమిస్ట్రీ కారణంగా నిజజీవితంలో వారిపై రుమర్లు కూడా లెక్కలేనన్ని వస్తున్నాయి.
