అల్లు కుటుంబంలో నాలుగో తరం వెండితెరపై కనిపించేందుకు రంగం సిద్ధమైంది. స్టైలిష్ స్టార్ అల్లు అర్జున్ గారాలపట్టి అల్లు అర్హ బిగ్ స్క్రీన్పై అలరించనుంది. గుణశేఖర్ స్వీయ నిర్మాణదర్శకత్వంలో రూపొందుతోన్న భారీ ప్రాజెక్ట్ 'శాకుంతలం'లో ఈ చిన్నారి నటించనుంది. దీనిపై అధికారిక ప్రకటన చేసింది చిత్రబృందం. ఈ సినిమాలో ప్రిన్స్ భరతగా అర్హ కనిపించనుంది.
మహాభారతంలోని ఆదిపర్వంలో శకుంతల, దుష్యంతుల ప్రేమకథ ఆధారంగా ఈ సినిమాను తెరకెక్కిస్తున్నారు. ఇందులో సమంత ప్రధానపాత్ర పోషిస్తుంది. దుష్యంతుడి పాత్రను మలయాళ నటుడు దేవ్ మోహన్ కనిపించనున్నారు. వీరిద్దరికీ జన్మించిన బాలుడు భరతుడి పాత్రలో అర్హ మెరవనుంది. ఈ సినిమా కోసం ఇప్పటికే భారీ సెట్స్ రూపొందించారు. కరోనా కారణంగా వాయిదాపడిన ఈ మూవీ చిత్రీకరణ తాజాగా తిరిగి ప్రారంభమైంది.
