హైదరాబాద్ నగర శివారు దుండిగల్ సమీపంలో ఖాజిపల్లి అర్బన్ ఫారెస్టు పార్క్‌కు రాష్ట్ర అటవీశాఖ మంత్రి ఇంద్రకరణ్ రెడ్డి, ఎంపీ సంతోశ్ కుమార్తో కలిసి యంగ్‌ రెబల్‌ స్టార్ ప్రభాస్ శంకుస్థాపన చేశారు. ఈ పార్కును ప్రభాస్ దత్తత తీసుకున్నారు. దీంతో ఔటర్ రింగ్‌ రోడ్డు వెంట మరో అర్బన్ ఫారెస్టు పార్కు అందుబాటులోకి రానుంది. తన తండ్రి దివంగత యూవీఎస్‌ రాజు పేరు మీద అర్బన్ పార్కు, అటవీ ప్రాంతాన్ని అభివృద్ది చేయనున్నట్లు ప్రభాస్ తెలిపారు.
ఈ పార్కు నిర్మాణం కోసం 1,650 ఎకరాల అటవీ భూమిని ఎంపీ సంతోశ్ కుమార్ చొరవతో దత్తత తీసుకున్న ప్రభాస్... రెండు కోట్ల రూపాయలు అందించారు. అవసరాన్ని బట్టి మరింత ఖర్చు చేసేందుకు సుముఖత వ్యక్తం చేశారు. ఈ సందర్భంగా వ్యూ పాయింట్ నుంచి అటవీ అందాలను ప్రభాస్ పరిశీలించారు. అనంతరం సంతోశ్ కుమార్తో కలిసి ప్రభాస్ మొక్కలు నాటారు.
త్వరలో మరిన్ని అర్బన్ ఫారెస్టు బ్లాక్‌ల దత్తతకు ప్రయత్నిస్తానని ఎంపీ సంతోశ్ కుమార్ తెలిపారు. ఈ కార్యక్రమంలో అటవీశాఖ ప్రత్యేక కార్యదర్శి శాంతి కుమారి, పీసీసీ ఎఫ్‌ శోభ ఇతర అధికారులు పాల్గొన్నారు.
