కరోనా మహమ్మారి అనంతరం మన జీవితాల్లో స్మార్ట్ఫోన్ల పాత్ర మరింత కీలకంగా, క్రియాశీలకంగా మారింది. కుటుంబసభ్యులు, బంధువులు, స్నేహితులతో వాయిస్, వీడియో, మెసేజ్ల రూపంలో సందేశాలను పంపించుకోగలం. ఇంట్లోనే ఉండి ఆఫీస్ పని, షాపింగ్ చేసుకోవచ్చు. ఎంటర్టైన్మెంట్ పొందగలం. కాబట్టి ఫోన్లో వైరస్ సమస్య (Smartphone Virus) ఉంటే వెంటనే పరిష్కారం కోసం చూడాలి. లేదంటే తీరని నష్టం తప్పదు.
ఇన్ని లాభాలు ఉన్నాయి కాబట్టే స్మార్ట్ఫోన్లను లక్ష్యంగా చేసుకొని తమ అవసరాల కోసం వాడుకుంటారు హ్యాకర్లు మోసగాళ్లు. అందుకోసం హానికర కోడ్లు వినియోగించి స్మార్ట్ఫోన్లోకి వైరస్ను చొప్పిస్తారు. ట్రోజన్ దాడులు చేస్తారు.
వైరస్లు, మాల్వేర్ నుంచి స్మార్ట్ఫోన్ను కాపాడుకోవడం ఎలా? (Smartphone Virus Detection)
వైరస్, మాల్వేర్ బారిన పడకుండా ఉండాలంటే కచ్చితంగా కొన్ని రూల్స్ను పాటించాలి. యాప్ స్టోర్ లేదా గూగుల్ ప్లే స్టోర్ వంటి విశ్వసనీయ సోర్సెస్ నుంచే నమ్మదగిన యాప్లను మాత్రమే డౌన్లోడ్ చేయాలి. ఏదైనా యాప్ను డౌన్లోడ్ చేసే ముందు యూజర్ రివ్యూలను చదవాలి. ఆయా యాప్లు అడిగే అనుమతుల పట్ల అప్రమత్తంగా ఉండాలి.
మీ స్మార్ట్ఫోన్కు వైరస్ సోకిందని తెలుసుకోవడం ఎలా? (Signs of Malware on Phone)
- ఎన్ని జాగ్రత్తలు తీసుకున్నా, అత్యుత్తమ విధానాలు పాటించినా.. వైరస్ లేదా మాల్వేర్ మీ స్మార్ట్ఫోన్లోకి ప్రవేశించే అవకాశం ఉంది. ఫోన్లో వైరస్ ఉందని ఇలా తెలుసుకోవచ్చు..
- మీ ఫోన్లో ఊహించని ఛార్జీలు కట్ అవుతున్నాయంటే వైరస్ (Mobile Virus Check) సోకినట్లే లెక్క. ప్రీమియం టెక్స్ట్ మెసేజ్లు, ఫోన్ కాల్స్ చేయడం, యూప్లో కొనుగోళ్ల ద్వారా హానికర యాప్లు ఆర్జిస్తాయి.
- భరించలేని యాడ్లు దర్శనమిస్తుంటే స్మార్ట్ఫోన్ యాడ్వేర్ బారినపడిందని అర్థం చేసుకోవచ్చు.
- మాల్వేర్, ట్రోజన్.. స్మార్ట్ఫోన్ నుంచి ఇతరులకు స్పామ్ టెక్స్ట్ మెసేజ్లు పంపించగలవు. దానివల్ల మీ కాంటాక్ట్స్లో ఉన్న వారి ఫోన్లు కూడా వైరస్ బారినపడే ప్రమాదం ఉంది.
- క్రమంగా స్మార్ట్ఫోన్ పెర్ఫార్మమెన్స్ తగ్గిపోవడం
- స్మార్ట్ఫోన్లో వైరస్లు, మాల్వేర్ కొత్త యాప్లను (Malicious Apps) డౌన్లోడ్ కూడా చేయగలవు.
- ఈ యాప్లు, మెసేజ్లు అపారమైన డేటాను వినియోగించగలవు. ఇలాంటి ఘటనలనూ అనుమానించాల్సిందే.
- బ్యాటరీ సామర్థ్యం, పనితీరు పడిపోవడం
ఇదీ చూడండి: కరోనాను ఆసరాగా చేసుకుని హ్యాకింగ్.. జాగ్రత్త సుమా!
