కార్తిక మాసం ముగిసిపోయింది - ఈ సండే మీ ఇంట్లో ఏం కూర - ఈ నాన్​వెజ్​ ట్రై చేస్తారా!

How to Make Chukkakura Chicken : కార్తికమాసం ముగిసి పోయింది.. సండే వచ్చేసింది. ఈ నెల రోజులు నాన్​వెజ్​కు దూరంగా ఉన్నవారంతా.. ఇప్పుడు ఓ పట్టు పట్టాలని ఉవ్విళ్లూరుతున్నారు. అయితే.. ఎప్పుడూ వండుకునేలా కాకుండా కాస్త వెరైటీగా నాన్​వెజ్​ డిషెస్ రెడీ చేసుకుంటే.. అదుర్స్ అంటూ లాగించేయొచ్చు.

Chukkakura Chicken Making Process : కేవలం ఆకుకూరలు వండుకుని తినాలంటే కష్టం కానీ.. వాటికి సరైన నాన్‌వెజ్‌ జోడీ దొరికితే ఆహా రుచి అదిరిపోతుంది! అయితే ఆకుకూరలతో నాన్​వెజ్​ అంటే అందరికీ.. గోంగూర, మెంతికూర మాత్రమే గుర్తొస్తాయి. కానీ.. ఇంకా చాలానే ఉన్నాయి. అందులో రెండు రెసిపీలను ఇవాళ ప్రయత్నిద్దాం.

చుక్కకూర చికెన్​: నాన్ వెజ్ ప్రియులకు చికెన్ మంచి ఫేవరెట్ డిష్. ఎలా వండినా.. టేస్ట్ అదిరిపోతుంది. అయితే.. చాలా మంది ప్రయోగాలు చేయకుండా.. ప్రతిసారీ ఒకేలా కుక్ చేసుకుంటారు. దీనివల్ల డిఫరెంట్​ ఫ్లేవర్​ను టేస్ట్​ చేసే ఛాన్స్ మిస్ చేసుకుంటున్నారు. మీరు కూడా రెగ్యులర్​గా ఒకేవిధంగా చికెన్​ వండుకుంటున్నట్టయితే.. ఈసారి మేము చెప్పే విధంగా ప్లాన్ చేయండి.

కావాల్సిన పదార్థాలు:

• చికెన్‌- అరకేజీ,
• చుక్కకూర- నాలుగు కప్పులు,
• పచ్చిమిర్చి- మూడు,
• అల్లం వెల్లుల్లి పేస్ట్‌- రెండు చెంచాలు
• నూనె- ఐదు చిన్న చెంచాలు,
• కారం- ఒకటిన్నర చెంచా,
• ఉప్పు- తగినంత,
• పసుపు- పావుచెంచా,
• ఉల్లిపాయ- ఒకటి,
• ధనియాలపొడి- ఒకటిన్నర చెంచా,
• గరంమసాలా- చెంచా,
• కొత్తిమీర తరుగు- రెండు చెంచాలు

తయారీ విధానం:

• ముందుగా చికెన్​ ముక్కలను మీడియం సైజ్​లో కట్​ చేసుకోవాలి.
• తర్వాత ఓ గిన్నె తీసుకుని అందులో చికెన్​, ఓ చెంచా అల్లంవెల్లుల్లి పేస్ట్‌, కారం, పసుపు, ఓ చెంచా ఉప్పు పట్టించి సుమారు అరగంటపాటు పక్కన పెట్టేయాలి.
• తర్వాత స్టౌపై కడాయి పెట్టి వేడెక్కాక నూనె పోసుకుని ఉల్లిపాయ ముక్కలు, పచ్చిమిర్చి బాగా వేయించుకోవాలి.
• తర్వాత మరో చెంచా అల్లం వెల్లుల్లి పేస్ట్‌ వేసి పచ్చి వాసన పోయేంతవరకు వేయించుకుని.. మారినేట్‌ చేసి పెట్టుకున్న చికెన్‌ని వేసి అందులోని నీరంతా పోయేంతవరకూ ఉడికించుకోవాలి.
• ఇప్పుడు కప్పున్నర నీళ్లు పోసి, ఉడుకుతున్నప్పుడు చుక్కకూర వేసి ఓ ఐదు నిమిషాలు ఉడికించుకోవాలి.
• తర్వాత ధనియాలపొడి, గరంమసాలా, తగినంత ఉప్పు వేసుకోని మరో ఐదు నిమిషాలు ఉడికించుకోవాలి.
• చివరిగా కొత్తిమీర వేసుకొని దించుకోవాలి. అంతే.. ఎంతో రుచికరంగా ఉండే చుక్కకూర చికెన్​ రెడీ!

తోటకూర కాడలు- రొయ్యల పులుసు:

కావాల్సిన పదార్థాలు:

• తోటకూర కాడలు- రెండు కప్పులు
• రొయ్యలు- కప్పు
• ఉల్లిపాయలు- రెండు
• అల్లం- చిన్నముక్క,
• వెల్లుల్లి రెబ్బలు- ఎనిమిది,
• పచ్చిమిర్చి- మూడు, కరివేపాకు- ఓ రెండు రెబ్బలు,
• నూనె- తగినంత,
• ఉప్పు- తగినంత,
• ఎండుమిర్చి- రెండు,
• జీలకర్రపొడి- చెంచా,
• ధనియాలపొడి- చెంచా,
• గరంమసాలా- చెంచా,
• కారం- చెంచా

తయారీ విధానం :

• స్టౌ వెలిగించి కడాయి పెట్టి వేడెక్కాక నూనె పోయాలి.
• అందులో కరివేపాకు, ఎండుమిర్చిని తుంచి వేసి బాగా వేగనివ్వాలి.
• తర్వాత.. తరిగిన తోట కూర కాడల్ని వేసి మూతపెట్టి బాగా మగ్గనివ్వాలి.
• ఇప్పుడు మిక్సీజార్‌లో ఉల్లిపాయ ముక్కలు, వెల్లుల్లి రెబ్బలు, అల్లం, గరంమసాలా, జీలకర్రపొడి, ధనియాలపొడి వేసి మెత్తగా మిక్సీ పట్టాలి.
• ఈ మసాలాను ఉడికిన తోటకూర కాడల్లో వేసుకోవాలి.
• అవి ఉడుకుతున్నప్పుడే.. ఉప్పు, కారం, పసుపు వేసి బాగా మగ్గనివ్వాలి.
• ఇందులోనే రొయ్యల్ని వేసుకుని గరిటెతో తిప్పుతూ ఉంటే రొయ్యల నుంచి నీరు వస్తుంది.
• అది కూడా ఆవిరయ్యేంతవరకూ ఉంచి.. తర్వాత కొద్దిగా నీళ్లు పోసి మూతపెట్టేయాలి.
• ఆ తర్వాత మరో పది నిమిషాలకు కూర సిద్ధమవుతుంది.