ఆస్తి కోసం భార్యతో కలిసి తండ్రిని కిరాతకంగా హత్య

ఆస్తి విషయంలో కన్న తండ్రినే హత్యచేశాడో కిరాతకుడు. భార్యతో కలిసి తండ్రిని కొడవలితో దారుణంగా చంపాడు. ఈ ఘటన ఏపీలోని అనంతపురం జిల్లా మామిళ్ళపల్లిలో జరిగింది. హత్య అనంతరం నిందితులు పరారయ్యారు. కేసు నమోదు చేసిన పోలీసులు నిందితుల కోసం గాలిస్తున్నారు.

ఏపీలోని అనంతపురం జిల్లా కనగానపల్లె మండలం మామిళ్ళపల్లిలో నారాయణస్వామి అనే వ్యక్తిని ఆయన కుమారుడు గణేశ్​, కోడలు దారుణంగా హత్య చేశారు. పోలీసులు తెలిపిన వివరాలు ప్రకారం.. బుధవారం రాత్రి 10 గంటల సమయంలో ఇంట్లో నిద్రపోతున్న నారాయణస్వామిపై గణేశ్​ కొడవలితో దాడి చేశాడు. హత్యకు గణేశ్​ భార్య కూడా సహకరించింది. తీవ్రగాయాలతో నారాయణస్వామి మృతి చెందారు. నారాయణస్వామికి ఇద్దరు కుమారులు కాగా గణేశ్​ చిన్న కుమారుడు.

రెండు రోజుల క్రితమే హైదరాబాద్ నుంచి నారాయణస్వామి మామిళ్ళపల్లికి వచ్చారు. నర్సరీ వ్యాపారం చేస్తూ నారాయణస్వామి జీవనం సాగిస్తున్నారు. తనకు ఆస్తి ఇవ్వలేదని గణేశ్​ తండ్రితో గొడవ పడ్డాడని, తండ్రిని అడ్డు తప్పిస్తే ఆస్తి దక్కుతుందని ఈ దారుణానికి ఒడిగట్టినట్లు పోలీసులు పేర్కొన్నారు. ధర్మవరం డీఎస్పీ రమాకాంత్ ఘటనాస్థలిని పరిశీలించారు. హత్యానంతరం నిందితులు పరారయ్యారు. పోలీసులు కేసు నమోదు చేసి విచారణ చేపట్టారు.

ఇదీ చదవండి : అమ్మా..ఇంటికిపోదాం.. తల్లి మృతదేహం వద్ద పసివాడు..