పన్ను ఎగవేత, అక్రమ ఆయుధాలు కలిగి ఉండటం వంటి నేరాలు చేసినట్లు ఒప్పుకునేందుకు అమెరికా అధ్యక్షుడు జో బైడెన్ కుమారుడు హంటర్ బైడెన్ సిద్ధమయ్యారు. తద్వారా ఈ కేసుల్లో జైలు శిక్షను తగ్గించుకోనున్నారు. ఈ మేరకు న్యాయశాఖతో హంటర్ బైడెన్ ఒప్పందం కుదుర్చుకోనున్నారు. డెలావేర్‌లోని యూస్ జిల్లా కోర్టులో దాఖలైన లేఖ ఆధారంగా మంగళవారం ఈ విషయం వెల్లడైంది.
2018 అక్టోబరులో 11 రోజుల పాటు డ్రగ్స్ తీసుకున్నారనే ఆరోపణలతో పాటు.. కోల్ట్ కోబ్రా 38 స్పెషల్ అనే హ్యాండ్‌గన్‌ను కలిగి ఉన్నారనే అభియోగాలు హంటర్ బైడెన్పై ఉన్నాయి. ఈ లెక్కన హంటర్ బైడన్కు గరిష్ఠంగా 10 సంవత్సరాల వరకు జైలు శిక్ష పడే అవకాశం ఉంది. కాకపోతే.. ఈ అభియోగాలపై బైడెన్ ముందస్తు ఒప్పందాన్ని కుదుర్చుకోనున్న నేపథ్యంలో శిక్ష ఎంత పడుతుందన్నది తెలియాల్సి ఉంది.
ఐదేళ్ల తరువాత ఇప్పుడు ఈ కేసు పరిష్కారం దిశగా వెళ్తోందని.. హంటర్ తరపు న్యాయవాది క్రిస్టోఫర్ క్లార్క్ అన్నారు. అయితే 53 ఏళ్ల హంటర్ ప్రతిపాదించిన ఈ ఒప్పందానికి ఫెడరల్ న్యాయమూర్తి ఆమోదం తెలపాల్సి ఉంది. ఈ విషయంలో కొన్నేళ్లుగా రిపబ్లికన్ చట్టసభ సభ్యుల నుంచి హంటర్ బైడెన్ మాటల దాడి ఎదుర్కొంటున్నారు. కాగా కుమారుడి విషయంలో అధ్యక్షుడు జోబైడెన్ కూడా ఈ విమర్శలు ఎదుర్కొవాల్సి వచ్చింది.
ల్యాప్టాప్ కేసులోనూ చిక్కులే..
ఈ రెండు కేసులతో పాటు హంటర్ బైడెన్ ల్యాప్టాప్కు సంబంధించిన వివాదం సైతం అమెరికాలో చర్చనీయాంశంగా ఉంది. తన కుమారుడు హంటర్ బైడెన్ అవినీతి ఆరోపణలపై ఉక్రెయిన్లో విచారణ జరగకుండా.. ఉపాధ్యక్ష పదవిలో ఉన్న సమయంలో జో బైడెన్ అక్కడి అధికారులపై ఒత్తిడి తెచ్చారన్నది ప్రధాన ఆరోపణ. ఈ విషయంలో ఉక్రెయిన్కు చెందిన ఓ కంపెనీ ప్రతినిధితో జో బైడెన్ భేటీ కూడా అయ్యారని న్యూయార్క్ పోస్ట్ గతంలో ఓ కథనంలో పేర్కొంది. జో బైడెన్ను కలిసే అవకాశం ఇప్పించినందుకు సదరు కంపెనీ ప్రతినిధి హంటర్ బైడెన్కు ఈమెయిల్ రాశారని కథనంలో వివరించింది. ఇందుకు సంబంధించిన మెయిళ్లు హంటర్ బైడెన్ ల్యాప్టాప్లో లభ్యమయ్యాయని రాసుకొచ్చింది. దీన్ని డెమొక్రాట్లు ఖండిస్తున్నారు.
ఈ కథనాన్ని ట్విట్టర్లో వైరల్ కాకుండా ఆ సంస్థ ఉద్యోగులు చర్యలు తీసుకున్నారని ఇటీవల బయటపడటం సంచలనం రేపింది. హంటర్ బైడెన్ ల్యాప్టాప్ రహస్యాలపై న్యూయార్క్ పోస్ట్ రాసిన కథనాన్ని ట్విట్టర్ తాత్కాలికంగా నిషేధించినట్లు ఆ సంస్థ మాజీ ఉన్నత ఉద్యోగిని విజయ గద్దె కొద్ది నెలల క్రితం అంగీకరించారు. వెంటనే ఆ కథనాన్ని పునరుద్ధరించేలా ట్విట్టర్ చర్యలు తీసుకుని ఉంటే బాగుండేదని భావిస్తున్నట్లు గతంలో చెప్పుకొచ్చారు. అమెరికా చట్టసభ్యుల ముందు ఈ మేరకు వివరాలు వెల్లడించారు. అయితే, ఆంక్షలు విధించడం వెనక ప్రభుత్వ హస్తమేమీ లేదని స్పష్టం చేశారు.
హంటర్ బైడెన్ ల్యాప్టాప్ స్టోరీ విషయంపై 2020 ఎన్నికల సమయంలో జో బైడెన్ టీమ్తో విజయ గద్దె జరిపినట్లు పేర్కొన్న సంభాషణలను ఇటీవల మస్క్ బయటపెట్టారు. ఓ స్వతంత్ర జర్నలిస్టు ద్వారా ఈ వివరాలను వెల్లడించారు. 'హంటర్ బైడెన్ ల్యాప్టాప్' అంశంపై సెన్సార్షిప్ విధించడం వెనక విజయ గద్దె క్రియాశీలంగా పనిచేశారని స్వతంత్ర జర్నలిస్టు, రచయిత మాట్ తైబీ పేర్కొన్నారు.
