కొవిడ్-19 కట్టడికి తమ దేశం ఇప్పటికే విడుదల చేసిన రెండు వ్యాక్సిన్లు సురక్షితంగా, సమర్థవంతంగా పనిచేస్తున్నాయని, మూడో టీకా విడుదలకు సిద్ధమవుతున్నట్లు తెలిపారు రష్యా అధ్యక్షుడు వ్లాదిమిర్ పుతిన్. కరోనా వైరస్ వ్యాక్సిన్ అంశంపై రాజకీయం చేయొద్దని హెచ్చరించారు.
వర్చువల్గా జరిగిన షాంఘై కోఆపరేషన్ ఆర్గనైజేషన్(ఎస్సీఓ) సమావేశంలో ప్రసంగించారు పుతిన్. ఔషధాలు, ఇతర అత్యవసర వస్తువులు అసరమైన దేశాలకు అందించే ఆలోచనకు రష్యా మద్దతు ఇస్తుందని తెలిపారు.
" రష్యాలో రెండు వ్యాక్సిన్లు విడుదల అయ్యాయి. ఆ టీకాలు సమర్థవంతమని, సురక్షితమని పనిచేస్తున్నాయి. ఎలాంటి దుష్ప్రభావాలు లేవని క్లినికల్ ట్రయల్స్ ఇప్పటికే ధ్రువీకరించాయి. మూడో వ్యాక్సిన్ విడుదలకు సిద్ధమవుతోంది. మేము ఇతర దేశాలకు సహకరించేందుకు సిద్ధంగా ఉన్నాం. అలాగే వ్యాక్సిన్పై రాజకీయాలకు దూరంగా ఉండాలని ప్రతిపాదిస్తున్నాం. యావత్ ప్రపంచానికి ఇప్పుడు టీకా అవసరం. ఏ దేశంతోనైనా కలిసి పనిచేయటానికి మేము సిద్ధం. "
- వ్లాదిమిర్ పుతిన్, రష్యా అధ్యక్షుడు
కరోనా వైరస్పై పోరాటానికి ఎస్సీఓ ఆధ్వర్యంలో సమగ్ర ప్రణాళికతో పాటు ప్రత్యేక ప్రకటన చేయబోతున్నామని తెలిపారు పుతిన్. సభ్యదేశాలు కరోనాను ఎదుర్కొంటున్న తరుణంలో రష్యా ఈ సమావేశానికి నేతృత్వం వహిస్తోందని.., ఈ విపత్కర సమయంలో ఆర్గనైజేషన్ అజెండాలో మార్పులు చేయాల్సిన అవసరాన్ని సూచిస్తున్నట్లు పేర్కొన్నారు. ఆరోగ్య సంరక్షణ విభాగంతో పాటు ప్రజలను కాపాడే అంశంపై సభ్య దేశాల మధ్య సంబంధాలను మెరుగుపరచాల్సిన అవసరం ఉందన్నారు పుతిన్. ఎస్సీఓ సభ్య దేశాల్లోని డయగ్నోస్టిక్స్ ల్యాబ్లకు 5 లక్షల కరోనా కిట్లతో పాటు.. ఉష్ణోగ్రతలను కొలిచే పరికరాలను సరఫరా చేశామని, కజకిస్థాన్, కిర్గిస్థాన్, తజకిస్థాన్, ఉజ్బెగిస్థాన్లకు రష్యా తన వైద్య బృందాలను పంపించినట్లు గుర్తు చేశారు.
ఇదీ చూడండి:'వ్యాక్సిన్ల ఉత్పత్తికి విదేశీ సంస్థలతో పొత్తుకు సిద్ధం'
