స్వీడిష్ అకాడమీ ఇవాళ సాహిత్యరంగంలో నోబెల్ పురస్కారాలను ప్రకటించింది. 2018 సంవత్సరానికిగాను పోలెండ్ రచయిత్రి ఓల్గా టోకార్జుక్, 2019కిగాను ఆస్ట్రియన్ నవలా, నాటక రచయిత పీటర్ హ్యాండ్కే ఈ విశిష్ట పురస్కారానికి ఎంపిక అయ్యారు.
లైంగిక వేధింపుల ఆరోపణలపై దుమారం నేపథ్యంలో 2018 నోబెల్ను గతేడాది ప్రకటించలేదు. ఆ పురస్కారాన్ని నేడు ప్రకటించారు.
1901 నుంచి సాహిత్యరంగంలో నోబెల్ ఇస్తున్నారు. ఇప్పటి వరకు సాహిత్య నోబెల్ అందుకున్న మహిళల్లో ఓల్గా టోకార్జుక్ 15వ వారు. ఆమె తరంలో అత్యంత ప్రతిభావంతమైన నవలా రచయిత్రిగా పేరుపొందారు. కాల్పనిక కథలను మనస్సుకు హత్తుకునేలా, కవితాత్మకంగా తీర్చిదిద్దడంలో ఆమె సిద్ధహస్తురాలు. ప్రతిక్షణం మారిపోయే ఈ రంగుల ప్రపంచాన్ని ఆమె అద్భుతంగా చిత్రీకరిస్తారు.
హ్యాండ్కే.. రెండో ప్రపంచ యుద్ధం తరువాత ఐరోపాలో అత్యంత ప్రభావవంతమైన రచయితగా కీర్తిగడించారు. ఆయన రచనలు సరికొత్తగా ఉంటాయి. మానవ అనుబంధాల విశిష్టతను చక్కని భాషా చాతుర్యంతో హ్యాండ్కే వివరిస్తారు. అందుకే వీరిరువురూ ఈ విశిష్ట పురస్కారానికి ఎంపికయ్యారని అకాడమీ ప్రకటించింది.
భారీ బహుమతి
ఓల్గా, పీటర్లకు నోబెల్ పురస్కారం సహా చెరో 9,12,000 డాలర్ల నగదు బహుమతి అందించనున్నారు.
పరువు, ప్రతిష్ఠ కోసం
1786లో ప్రారంభమైన స్వీడిష్ అకాడమీ గతేడాది లైంగిక వేధింపుల వ్యవహారంతో సతమతమైంది.
అకాడమీతో సన్నిహిత సంబంధాలు ఉన్న జీన్-క్లాడ్ ఆర్నాల్డ్ (ఫ్రాన్స్) 2018లో అత్యాచార కేసులో జైలుకెళ్లారు. ఫలితంగా అకాడమీలోని 18 మంది సభ్యుల మధ్య చీలికలు వచ్చాయి. అయితే సభ్యుల మధ్య ఏకాభిప్రాయం తెచ్చి, పారదర్శకంగా సమస్యను సరిచేయడానికి అకాడమీ తీవ్రంగా ప్రయత్నిస్తోంది.
ఇదీ చూడండి: దీపావళి ముందు తగ్గిన బంగారం జోరు...!
