టాయిలెట్ పేపర్లును లొట్టలేసుకుంటూ తినేస్తున్నారు జర్మనీ వాసులు. టాయిలెట్ పేపర్లు తినడం ఏంటి అనుకుంటున్నారా? ఇవి సాధారణ పేపర్లు కాదు. వాటి ఆకారంలో తయారు చేసిన కేకులు. అందుకే ప్రజలు వీటిపై మక్కువ చూపిస్తున్నారు.
జర్మనీ డోర్ట్మండ్లో ఓ వ్యక్తి టాయిలెట్ పేపర్ల ఆకారంలో కేక్లను తయారు చేసి అందర్నీ ఆశ్చర్యానికి గురిచేశాడు. ఓ కేకు చుట్టూ క్రీమ్ పూసి, దానిపై టాయిలెట్ పేపర్ల ఆకారంలో కేకును తయారు చేశాడు 36 ఏళ్ల టిమ్ కోర్టుయమ్. అయితే ఇదంతా కేవలం సరదా కోసమే చేశానని చెప్పాడు టిమ్. విభిన్న ఆకృతుల్లో ఇలా ఎనిమిది కేకులు చేసి సామాజిక మాధ్యమాల్లో ఫొటోలు పోస్ట్ చేశాడు. వాటిని చూసిన అందరూ ఆశ్చర్యానికి గురై ఆర్డర్ చేయడం ప్రారంభించారు. ప్రస్తుతం ఈ కేకులు అధికంగా అమ్ముడవుతున్నాయి.
" కేవలం సరదాకోసం టాయిలెట్ పేపర్ల ఆకృతిలో కేకులను తయారు చేశాం. వీటిని ఆన్లైన్లో ఉంచగా అందరూ వీటికి ఆకర్షితులై ఆర్డర్ చేయడం ప్రారంభించారు. అప్పటి నుంచి వీటి సంఖ్యను పెంచాం. ప్రస్తుతం వీటిని చాలా మంది వినియోగదారులు కోరుకుంటున్నారు. ప్రస్తుతం రోజుకు 200 తయారు చేస్తున్నాం."
-- టిమ్ కోర్టుయమ్
ఇదీ చదవండి: కరోనా బాధితుల ప్రవాహంతో హోటళ్లే ఆస్పత్రులు!
