అమెరికా అధ్యక్షుడిగా డొనాల్డ్ ట్రంప్ నాలుగేళ్ల పాలనలో విలవిలలాడింది చైనా. వాణిజ్య యుద్ధం నుంచి కరోనా సంక్షోభం వరకు అనేక సందర్భాల్లో చైనాపై కఠినంగా వ్యవహరించారు ట్రంప్. అయితే ఇంకొన్ని రోజుల్లో ట్రంప్ ఆ పదవి నుంచి తప్పుకోనున్నారు. అగ్రరాజ్య అధ్యక్ష ఎన్నిక ఎన్నికల విజేత జో బైడెన్ ఆ పీఠాన్ని అధిరోహించనున్నారు. కానీ చైనా పరిస్థితి మాత్రం మారేలా కనిపించడం లేదు. ఆ దేశంపై బైడెన్ మరింత కఠినంగా వ్యవహరించి, మరిన్ని ఆంక్షలు విధించే అవకాశముందని ఊహాగానాలు జోరందుకున్నాయి. ఈ క్రమంలో చైనా అప్రమత్తమైంది. జో బైడెన్తో బంధాన్ని పెంచుకునేందుకు ప్రయత్నాలు మొదలుపెట్టింది. ఇందుకోసం చర్చల ప్రతిపాదనను తెరపైకి తెచ్చింది.
అన్ని స్థాయిల్లో అమెరికా-చైనా చర్చలు జరపాలని పిలుపునిచ్చారు చైనా విదేశాంగమంత్రి వాంగ్ యీ. అమెరికా-చైనా వ్యాపార మండలి బోర్డ్ ఆఫ్ డైరక్టర్స్ సమావేశంలో ఈ వ్యాఖ్యలు చేశారు.
"సంప్రదింపులు జరిపేందుకు చైనా ఎప్పుడూ సిద్ధమే. చర్చలు జరపాల్సిన అంశాల జాబితాను రూపొందించవచ్చు. ఒకరికి ఒకరు సహకరించుకుంటూ విభేదాలను పరిష్కరించుకోవచ్చు. దీర్ఘకాల విషయాలు, వ్యూహాత్మక అంశాలపై ఇరుదేశాలు ఎప్పటికప్పుడు అవగాహన పొందేందుకు ఇది ఉపయోగపడుతుంది."
--- వాంగ్ యీ, చైనా విదేశాంగమంత్రి.
అమెరికా- చైనా మధ్య బంధం బలహీనపడటాన్ని ఎవరూ చూడాలనుకోవడం లేదని, అమెరికాలోని సంఘాలు కూడా ఇదే అనుకుంటున్నాయని పేర్కొన్నారు వాంగ్. ఇరు దేశాల ప్రజల శ్రేయస్సు కోసం త్వరగా చర్చలు మొదలవ్వాలని అభిప్రాయపడ్డారు.
బైడెన్ కఠినమే!
చైనాపై ట్రంప్ అవలంబించిన కఠిన వైఖరిని కొనసాగిస్తానని ఇప్పటికే సంకేతాలిచ్చారు బైడెన్. ఆ దేశంతో ఇప్పట్లో చర్చలు జరపనని, ట్రంప్ అమలు చేసిన ఆంక్షలు కూడా ఇప్పట్లో వెనక్కి తీసుకోమని స్పష్టం చేశారు.
ఇదీ చూడండి:- చొచ్చుకొస్తున్న చైనా- సరిహద్దుల్లో గ్రామాలు నిర్మాణం!
