vaccine hoarding: కరోనా కొత్త వేరియంట్ ఒమిక్రాన్.. ప్రపంచ దేశాలను వణికిస్తోంది. ఈ క్రమంలో ప్రపంచవ్యాప్తంగా అన్ని దేశాలకు కరోనా టీకాలు పూర్తి స్థాయిలో పంపిణీ అయితేనే వైరస్పై విజయం సాధ్యమని డబ్ల్యూహెచ్ఓ తెలిపింది. సంపన్న దేశాల టీకా నిల్వలు కరోనా కొనసాగింపునకు కారణమని హెచ్చరించింది. ఒమిక్రాన్పై ప్రస్తుతం ఉన్న టీకాలు పనిచేస్తాయని లాబొరేటరీ డేటా తెలుపుతున్నప్పటికీ వ్యాధి తీవ్రంగా ఉన్నవారిపై ఎంతమేరకు పనిచేస్తాయో తెలియదని స్పష్టం చేసింది.
ప్రపంచం ఇంకా హెర్డ్ ఇమ్యునిటీని సాధించలేకపోయిందని డబ్ల్యూహెచ్ఓకు చెందిన ఇమ్యూనైజేషన్ డిపార్ట్మెంట్ డైరెక్టర్ డా.కాటె ఒబ్రెయిన్ అన్నారు. అన్ని దేశాలకు వ్యాక్సిన్ పంపిణీ సమాన స్థాయిలో జరగకపోవడమే దీనికి కారణమని చెప్పారు. 'ధనిక దేశాలు వ్యాక్సిన్ డ్రైవ్లతో భారీగా టీకాలను ప్రజలకు పంపిణీ చేశాయి. కానీ పేద దేశాలు టీకా కొరతతో తమ పౌరులకు వ్యాక్సిన్ను అందించలేకపోయాయి. దీని కారణంగానే కొత్త వేరియంట్లు పుట్టుకొస్తున్నాయి. టీకా వేసుకోనివారికి ఇది ప్రమాదకరంగా మారుతుంది.' అని స్పష్టం చేశారు.
omicron cases in uk..
బ్రిటన్లో కేవలం ఒక్క రోజులోనే రెండు రెట్లు ఒమిక్రాన్ కేసులు పెరిగాయి. బుధవారం 249గా ఉన్న ఒమిక్రాన్ కేసులు గురువారం నాటికి 817కి ఎగబాకాయని యూకే ఆరోగ్య విభాగం వెల్లడించింది. వచ్చే నాలుగు వారాల్లో నమోదయ్యే కరోనా కేసుల్లో 50 శాతం ఒమిక్రాన్ వేరియంట్కు సంబంధించినవే ఉండనున్నాయని తెలిపింది. ఊహించిన దానికంటే వేగంగా ఈ వేరియంట్ వ్యాపిస్తోందని పేర్కొంది. దీనిని ఎదుర్కొనడానికి టీకాలు వేసుకోవడం తప్పనిసరని స్పష్టం చేసింది.
omicron cases malawi..
ఆఫ్రికా దేశమైన మలావీలో ఒమిక్రాన్ వేరియంట్ కేసులు వెలుగులోకి వచ్చాయి. తొలిసారిగా 3 ఒమిక్రాన్ కేసులు బయటపడినట్లు ఆ దేశ ఆరోగ్య శాఖ తెలిపింది. కరోనా నిబంధనలు కఠినతరం చేస్తున్నట్లు పేర్కొంది. పర్యటకులకు 72 గంటల ముందు కరోనా నెగెటివ్ రిపోర్ట్ను తప్పనిసరి చేసింది.
ఇదీ చదవండి:57 దేశాలకు విస్తరించిన ఒమిక్రాన్.. డబ్ల్యూహెచ్ఓ హై అలర్ట్
