ఈ వారం చివరినాటికి 160 మిలియన్ల మంది అమెరికన్లకు వ్యాక్సినేషన్(రెండు డోసులు) పూర్తవుతుందని ఆ దేశ అధ్యక్షుడు జో బైడెన్(Joe Biden) ప్రకటించారు. మహమ్మారి నుంచి స్వేచ్ఛను పొందేరోజు ఎంతో దూరంలో లేదని వ్యాఖ్యానించారు. ఈ ఏడాది జనవరి నుంచి కొవిడ్ కేసులు(Covid cases), మరణాలు 90 శాతం తగ్గాయని పేర్కొన్న ఆయన.. పూర్తిగా టీకా(రెండు డోసులు) అందుకున్న దేశ పౌరులు.. కరోనా ముందునాటి సాధారణ జీవితాన్ని గడుపుతున్నారని తెలిపారు.
"కొవిడ్ పోరులో తుది ఘట్టానికి చేరుకున్నాం. ఈ విషయాన్ని చెప్పడానికి చాలా గర్వంగా ఉంది. 150 రోజుల్లోనే 300 మిలియన్ల డోసులను పంపిణీ చేశాం. 182 మిలియన్ల మందికిపైగా ఒక డోసును అందుకున్నారు. అందులో 90 శాతం వృద్ధులు సహా 27ఏళ్లు దాటిన 70 శాతం మందికి టీకా వేశాం. ఈ వారం చివరి నాటికి పూర్తిగా టీకా అందుకున్నవారి సంఖ్య 160 మిలియన్ల మార్కును దాటనుంది. జులై నాలుగో తేదీకి నిర్దేశించిన లక్ష్యాన్ని ఆ తర్వాత మరి కొన్నిరోజుల్లోనే చేరుకోనున్నాం."
- అమెరికా అధ్యక్షుడు జో బైడెన్
నాలుగు దశాబ్దాల గరిష్ఠానికి ఆర్థిక వృద్ధి
దేశంలో త్వరలోనే సాధారణ పరిస్థితులు ఏర్పడతాయని.. వాణిజ్య సంస్థలు తిరిగి తెరుచుకుంటాయన్నారు. ఆర్థిక వృద్ధి నాలుగు దశాబ్దాల గరిష్ఠానికి చేరుకుంటుందని పేర్కొన్నారు. కరోనాపై విజయానికి అమెరికా చేరువయ్యిందన్న బైడెన్.. కొవిడ్ను పూర్తిగా అధిగమించలేదన్నారు.
ఆ దాడి.. ప్రజాస్వామ్య మనుగడకు పరీక్ష
అమెరికాలో క్యాపిటల్ భవనంపై జనవరి 6న జరిగిన దాడిని అస్తిత్వ సంక్షోభంగా పేర్కొన్నారు బైడెన్. దేశంలో ప్రజాస్వామ్యం మనుగడలో ఉన్నప్పటికీ.. దానిని ద్వేషం, ఉగ్రవాదం నుంచి కాపాడుకోవాలన్నారు.
"అంతర్యుద్ధ సమయంలో కూడా క్యాపిటల్ భవనంపై దాడి జరగలేదు. కానీ ఆరు నెలల క్రితం ఇదే రోజున అల్లరి మూకలు క్యాపిటల్ భవనం, ప్రజాప్రతినిధులు, పోలీసులపై దాడికి పాల్పడ్డారు. ఇది అసమ్మతి కాదు. రుగ్మత. అస్తిత్వ సంక్షోభం. ప్రజాస్వామ్య మనుగడుకు పరీక్ష" అని జో బైడెన్ వ్యాఖ్యానించారు.
జాతి ఐక్యత కోసం అందరు కలిసి పని చేయాలన్నారు బైడెన్. అమెరికన్లుగా అవధుల్లేని శక్తి సామర్థ్యాలను ప్రదర్శించాలన్నారు. చట్టంపై గౌరవ, మర్యాదలు పునరుద్ధరించాలని పేర్కొన్నారు.
ఇదీ చూడండి: 'కరోనాపై విజయానికి చేరువయ్యాం.. కానీ'
