US Omicron Cases: ప్రపంచవ్యాప్తంగా ఆందోళన కలిగించే స్థాయిలో ఒమిక్రాన్ వేరియంట్ వ్యాపిస్తోంది. అగ్రరాజ్యం కూడా అందుకు మినహాయింపు కాదు. అమెరికాలో గత వారం నమోదైన కొవిడ్ కేసుల్లో 59 శాతం ఒమిక్రాన్ బాధితులే ఉన్నారు. అంతకుముందు వారంలో ఇది 23 శాతంగా ఉండేది. ఈ విషయాన్ని సెంటర్స్ ఫర్ డిసీజ్ కంట్రోల్ అండ్ ప్రివెన్షన్-సీడీసీ మంగళవారం వెల్లడించింది.
అయితే ఇదివరకుతో పోలిస్తే ఈ అంచనాను తగ్గించినట్లు సీడీసీ పేర్కొంది. కానీ ఒమిక్రాన్ తీవ్రత కొనసాగుతోందని స్పష్టం చేసింది.
California records more than 5 million cases
- అమెరికా కాలిఫోర్నియాలో ఇప్పటివరకు 50 లక్షలకు పైగా కరోనా కేసులు వెలుగుచూశాయి. ఇన్ని కేసులు వచ్చిన తొలి రాష్ట్రంగా అవతరించింది. ఒక్క కాలిఫోర్నియాలోనే 75 వేల 500 మంది కొవిడ్తో ప్రాణాలు కోల్పోయారు.
- 2020 జనవరి 25న అక్కడ తొలి కరోనా కేసు నమోదైంది. నవంబర్ 11 నాటికి అంటే 292 రోజుల్లో మిలియన్ మార్కుకు చేరింది.
- గత వారంలో చూసుకుంటే.. ప్రతి లక్ష మందిలో సగటున 16 మందికి వైరస్ సోకింది. ఈ క్రమంలోనే ఆస్పత్రిలో చేరుతున్న బాధితుల సంఖ్య కూడా క్రమంగా పెరుగుతోంది.
- చైనాలో తొలి కరోనా కేసు వెలుగుచూసిన రోజుల్లో అమెరికాలోని కాలిఫోర్నియా కూడా ఎక్కువ ప్రభావితమైంది.
- 2020 మార్చిలోనే ఆంక్షలు విధించారు స్థానిక గవర్నర్. స్టే ఎట్ హోం ఆర్డర్ జారీ చేశారు. వ్యాపారాలు మూసివేశారు. అయినా కరోనా వైరస్ చాపకింద నీరులా విస్తరించింది.
టెక్సాస్లో 44 లక్షలు, ఫ్లోరిడాలో 39 లక్షల మంది కరోనా బారినపడ్డారు.
స్పెయిన్లో తీవ్రం..
ఐరోపా దేశాల్లో కూడా ఒమిక్రాన్ శరవేగంగా వ్యాపిస్తోంది. స్పెయిన్లో ఒమిక్రాన్ వ్యాప్తి తారస్థాయికి చేరుకుంది. దేశంలో సోమవారం.. కొత్తగా 214,619 కరోనా కేసులు నమోదయ్యాయి. ఈనెల 23 నుంచి ఇప్పటివరకు 120 మంది ప్రాణాలు కోల్పోయారు. ఈ నేపథ్యంలో ఆంక్షలను కట్టుదిట్టం చేసింది అక్కడి ప్రభుత్వం. నవార్రా, ఆరగాన్, కెంటాబ్రియా సహా పలు ప్రాంతాల్లో రాత్రి కర్ఫ్యూను మొదలైన ఆంక్షలను అమలు చేసింది.
ఇండోనేసియాలో..
ఒమిక్రాన్ వ్యాప్తి తీవ్రం అవుతున్న ఇండోనేసియాలో తొలిసారిగా స్థానికులలో వైరస్ను గుర్తించారు అధికారులు. విదేశీ ప్రయాణాలు, విదేశీయులతో ఎలాంటి సంబంధంలేని ఓ 37 ఏళ్ల వ్యక్తిలో ఒమిక్రాన్ను గుర్తించినట్లు అక్కడి ప్రభుత్వం వెల్లడించింది. ఈనెల 26న ఆ వ్యక్తికి వైరస్ సోకినట్లు నిర్ధరణ అయిందని పేర్కొంది. దీంతో ఇండోనేసియాలో మొత్తం ఒమిక్రాన్ కేసుల సంఖ్య 47కు చేరింది.
ఇదీ చూడండి : కార్లలో కరోనా పరీక్షలకు.. ఆస్పత్రుల వద్ద భారీ క్యూ
