అమెరికా ఉపాధ్యక్షురాలు కమలా హారిస్.. తన నివాసాన్ని తాత్కాలికంగా చారిత్రక బ్లెయిర్ హౌస్కు మార్చారు. ఆమె అధికారిక నివాసమైన నావల్ అబ్జర్వేటరీలో మరమ్మతులు జరుగుతున్నందునే.. ఈ నిర్ణయం తీసుకున్నట్టు కమల అధికార ప్రతినిధి సిమోన్ శాండర్స్ తెలిపారు.
అగ్రరాజ్య అధ్యక్షుని అధికారిక అతిథి గృహమైన బ్లెయిర్ హౌస్.. పెన్సిల్వేనియాలో శ్వేతసౌధానికి వెళ్లే మార్గంలో ఉంటుంది. ఉపాధ్యక్షురాలి అధికారిక నివాస భవనమైన నావల్ అబ్జర్వేటరీ కాంప్లెక్స్.. వైట్ హౌస్కు వాయువ్యంలో సుమారు 4 మైళ్ల దూరంలో ఉంటుంది.
1893లో నిర్మించిన 33 గదుల భవనం(నావస్ అబ్జర్వేటరీ)లో చిమ్నీలు, ఇతర పనుల కోసం సిబ్బంది కొత్త లైనర్స్పై పని చేస్తున్నారని వాషింగ్టన్ పోస్ట్ ఆదివారం తెలిపింది. 1824లో ఓ ప్రైవేట్ గృహంగా నిర్మించిన బ్లెయిర్ హౌస్.. 1942 నుంచి యూఎస్ ప్రెసిడెంట్ అతిథి గృహంగా మారింది. విదేశీ ప్రముఖులు సందర్శించే 120 గదులు కలిగిన ఈ అందమైన, చరిత్రక భవనంలో గతంలో.. భారత ప్రధాని నరేంద్ర మోదీ సహా ఇతర భారత నాయకులు బస చేశారు.
ప్రమాణ స్వీకార కార్యక్రమానికి ముందు అధ్యక్షుడు జో బైడెన్, అమెరికా ప్రథమ మహిళ ఇక్కడే ఉన్నట్టు సమాచారం.
ఇదీ చదవండి: బైడెన్ బృందంలో మరో నలుగురు భారతీయులు
