దాదాపు ఏడాదిన్నర గ్యాప్ తర్వాత టాలీవుడ్ సుప్రీమ్ హీరో సాయి ధరమ్ తేజ్ ప్రేక్షకుల ముందుకు రానున్నారు. తన 15వ సినిమాకు 'విరూపాక్ష' అనే టైటిల్ను ఖరారు చేసింది మూవీ టీమ్. 'పుష్ప' డైరెక్టర్ సుకుమార్ ఈ సినిమాకు కథను అందించగా.. ఆయన శిష్యుడు కార్తిక్ దండు దర్శకుడిగా మారి ఈ సినిమాను తెరకెక్కిస్తున్నారు. శ్రీ వెంకటేశ్వర సినీ క్రియేషన్స్ పతాకంపై తెరకెక్కుతున్న ఈ సినిమాలో సాయి ధరమ్ తేజ్ సరసన సంయుక్త హీరోయిన్గా నటిస్తున్నారు. కాగా 'కాంతార' ఫేమ్ మ్యూజిక్ డైరెక్టర్ అజనీష్ లోకనాథ్ ఈ సినిమాకు సంగీతం అందిస్తున్నారు.
ఓ భిన్నమైన కథాంశంతో తెరకెక్కుతున్న ఈ సినిమా ఏప్రిల్ 21న థియేటర్లలో సందడి చేయనుంది. ఇప్పటికే టైటిల్ గ్లింప్స్తో అభిమానుల్లో భారీ అంచనాలను పెంచేసింది. అంతే కాకుండా ప్రమోషన్లలో భాగంగా సినిమా యూనిట్ పలు అప్డేట్లను ప్రేక్షకుల ముందుకు తెస్తోంది. ఇటీవలే ఓ బైక్ స్టంట్ వీడియోను సోషల్ మీడియాలో రిలీజ్ చేసింది. తాజాగా ఈ మూవీ టీజర్ను రిలీజ్ చేసేందుకు చిత్ర యూనిట్ సన్నాహాలు చేస్తోంది. మార్చి 1న రిలీజ్ చేసేందుకు సిద్ధమైన టీజర్ను అంత కంటే ముందే పవర్ స్టార్ పవన్ కల్యాణ్కు చూపించింది. టీజర్ చూసిన పవన్.. బాగుందంటూ మూవీ టీమ్ను ప్రశంసించారు. ఇక టీజర్ రిలీజ్ సమయంలో తీసిన కొన్ని ఫొటోలను సాయి ధరమ్ తేజ్ సామాజిక మాధ్యమాల్లో పోస్ట్ చేశారు.
''ఇంతకంటే ఇంకేం అడగగలను.. 'విరూపాక్ష' సినిమా నా జీవితంలో ఓ కీలకమైన అడుగు లాంటిది. అలాంటి క్షణాన్ని మామయ్య ఆశీస్సులతో ప్రారంభించడం నాకు ఎంతో ఆనందంగా ఉంది. కళ్యాణ్ మామా మీ ప్రేమకు, ప్రశంసలకు ఎల్లప్పుడూ.. మీరు నా కోసం నిలబడుతున్నందుకు ప్రత్యేక ధన్యవాదాలు'' అంటూ ఓ ఎమోషనల్ ట్వీట్ను పోస్ట్ చేశారు.
కాగా 'విరూపాక్ష' సినిమాతో బిజీగా ఉన్న సాయి ధరమ్ తేజ్.. తమిళ నటుడు సముద్రఖని తెరకెక్కిస్తున్న 'వినోదాయ సీతమ్' రీమేక్లో పవన్ కల్యాణ్తో నటిస్తున్నారు. అటు పవన్ కల్యాణ్ కూడా వరుస సినిమా షూట్లతో బిజీగా ఉన్నారు.
