koffee with karan allu arjun: బాలీవుడ్ మోస్ట్ పాపులర్ టాక్ షో 'కాఫీ విత్ కరణ్'. ప్రముఖ దర్శక నిర్మాత కరణ్ జోహార్ వ్యాఖ్యాతగా వ్యవహరించే ఈ షోకు ఎంతో మంది టాప్ సెలెబ్రిటీలు వస్తుంటారు. ఈ షో ఏడో సీజన్ను ఓటీటీలో ప్రసారం చేయనున్నట్లు ఇదివరకే కరణ్ వెల్లడించారు. ఇప్పటివరకు బాలీవుడ్ సెలెబ్రిటీలే ప్రధానంగా పాల్గొనే ఈ షోలో ఇకపై.. సౌత్ఇండియా స్టార్లు సందడి చేయనున్నారు. దేశవ్యాప్తంగా ఉన్న వివిధ చిత్ర పరిశ్రమల నుంచి సెలెబ్రిటీలను పిలవనున్నట్లు తెలుస్తోంది. పుష్పతో పాన్ ఇండియా రేంజ్లో మరింత క్రేజ్ పెంచుకున్న అల్లు అర్జున్.. ఈ టాక్షోలో పాల్గొంటారని సమాచారం. పుష్పలో తన తోటి నటి రష్మిక మంధానతో కలిసి కాఫీ విత్ కరణ్కు బన్నీ వస్తారని తెలుస్తోంది.
koffee with karan season 7: రష్మిక ఇప్పటికే అన్ని సినీ ఇండస్ట్రీలలో సినిమాలు చేస్తూ దూసుకెళ్తున్నారు. ఆమె ఖాతాలో రెండు హిందీ సినిమాలు కూడా ఉన్నాయి. మరోవైపు, అల్లు అర్జున్ ఇటీవల బాలీవుడ్ దర్శకుడు సంజయ్ లీలా భన్సాలీతో భేటీ అయ్యారు. హిందీలో నేరుగా ఓ చిత్రం చేసేందుకే వీరు కలిశారని ఇండస్ట్రీ వర్గాలు కోడై కూస్తున్నాయి. ఈ నేపథ్యంలో వీరిరువురూ కరణ్ జోహార్ షోలో పాల్గొంటారని ప్రస్తుతం కథనాలు వస్తున్నాయి.
మరోవైపు, రామ్చరణ్, తారక్ సైతం కరణ్ షోలో కనివిందు చేయనున్నట్లు సమాచారం. టాలీవుడ్ నుంచి ప్రభాస్ ఇప్పటికే రెండుసార్లు ఈ షోకు వెళ్లారు. బాహుబలి సమయంలో ఓసారి, సాహో సినిమా రిలీజ్కు ముందు మరోసారి కరణ్ షోలో పాల్గొన్నారు. అయితే, డార్లింగ్ను మరోసారి గెస్ట్గా కరణ్ ఆహ్వానించనున్నట్లు తెలుస్తోంది. సమంత, నయనతార, విగ్నేశ్ శివన్ సహా మరికొందరు టాలీవుడ్, సౌత్ సెలెబ్రిటీలు ఇందులో పాల్గొంటారని టాక్.
ఇదీ చదవండి: కేజీఎఫ్ నటుడు మృతి... సినీ ప్రముఖుల దిగ్భ్రాంతి
