రీసెంట్గా వాల్తేరు వీరయ్య, వీరసింహారెడ్డి చిత్రాలతో సంక్రాంతి బాక్సాఫీస్ జాతర ముగిసిన సంగతి తెలిసిందే. దీంతో దర్శకనిర్మాతలందరూ సమ్మర్, దసరా సీజన్ బెర్త్లను ఖరారు చేసుకునేందుకు రెడీ అవుతున్నారు. త్వరత్వరగా తమ చిత్రాల షూటింగ్లను పూర్తి చేసి ప్రేక్షకుల ముందుకు తీసుకొచ్చేందుకు ప్రయత్నాలు చేస్తున్నారు. అలా SSMB 28, సలార్, హరిహర వీరమల్లు, ఎన్బీకే 108 సహా పలు సినిమాలు దసరా బరిలో దిగేందుకు రెడీ అవుతున్నట్లు గత కొద్ది రోజులుగా ప్రచారం జరుగుతున్న సంగతి తెలిసిందే. అయితే ఇప్పటికే ప్రభాస్ సలార్ సెప్టెంబరు 28న రిలీజ్ డేట్ను ఖరారు చేసుకుంది. కానీ మిగతా చిత్రాలు మాత్రం ఇంకా కచ్చితమైన డేట్స్ను సెట్ చేసుకోలేదు.
కానీ ఇప్పుడు తాజాగా హరిహర వీరమల్లు, ఎన్బీకే 108 సినిమాలు రిలీజ్ డేట్స్ వివరాలు బయటకు వచ్చాయి. అంతా అనుకున్నట్లు జరిగితే ఈ రెండు సినిమాలు వారం రోజుల గ్యాప్లో ప్రేక్షకుల ముందుకు వచ్చేందుకు సిద్ధం అవుతున్నట్లు సమాచారం అందుతోంది. అంటే ఈ సంక్రాంతికి ఒక్కరోజు గ్యాప్తో చిరు-బాలయ్య పోటీపడగా.. ఈ దసరాకు ఏడు రోజుల గ్యాప్లో బాలయ్య పవన్ పోటీ పడనున్నారని అర్థమవుతోంది.
ఇక హరిహర వీరమల్లు విషయానికొస్తే.. పవర్స్టార్ పవన్ కళ్యాణ్ కెరీర్లోనే అత్యంత భారీ బడ్జెట్తో తెరకెక్కుతున్న ఈ చిత్రాన్ని.. దర్శకుడు క్రిష్ రూపొందిస్తున్నారు. తొలిసారి పవన్.. ఇటువంటి పీరియాడిక్ సినిమాలో నటిస్తున్నారు. 17వ శతాబ్దం నాటి చారిత్రక కథనంతో ఈ మూవీ పాన్ ఇండియా యాక్షన్ చిత్రంగా తెరకెక్కుతోంది. ఏఎం రత్న నిర్మిస్తున్నారు. ఇందులో పవన్ గజదొంగగా కనిపించనున్నారు. అయితే ప్రస్తుతం శరవేగంగా షూటింగ్ జరుపుకుంటున్న ఈ భారీ సినిమా అక్టోబర్ 13న విడుదలకు సిద్ధమవుతున్నట్లు తెలిసింది.
అలాగే అఖండ, వీరసింహారెడ్డి వంటి బ్యాక్ టు బ్యాక్ వరుస హిట్లను ఖాతాలో వేసుకున్న బాలకృష్ణ.. ప్రస్తుతం అనిల్ రావిపూడితో NBK 108 సినిమా చేస్తున్నారు. ఫాదర్ అండ్ డాటర్ సెంటిమెంట్తో రూపొందుతున్న ఈ చిత్రంలో బాలయ్యకు కూతురిగా హీరోయిన్ శ్రీలీల నటిస్తోంది. ప్రస్తుతం ఈ సినిమా కూడా చిత్రీకరణ జరుపుకుంటోంది. అయితే ఈ చిత్రాన్ని అక్టోబర్ 20న ప్రేక్షకుల ముందుకు తీసుకురావాలని మేకర్స్ ప్లాన్ చేస్తున్నారట. మరి ఈ రెండు చిత్రాలు అనుకున్న సమయానికి వస్తే.. వారం రోజుల వ్యవధిలో పవన్-బాలయ్య థియేటర్లలో సందడి చేసినట్లవుతుంది. చూడాలి మరి ఏం జరుగుతుందో.
ఇదీ చూడండి: ఎగ్జామ్స్ ఎఫెక్ట్.. థియేటర్లో చిన్న సినిమాలు.. ఓటీటీలో బ్లాక్బస్టర్లు
