2024 Sankranthi Movies : ఈ ఏడాది సంక్రాంతికి బాక్సాఫీస్ వద్ద ఎన్నో సినిమాలు పోటీకి సిద్ధంగా ఉన్నాయి. అందులో మహేశ్ 'గుంటూరు కారం', వెంకటేశ్ 'సైంధవ్', తేజ సజ్జా 'హనుమాన్'తో పాటు నాగార్జున 'నా సామి రంగ' సినిమాలు సంక్రాంతి రేసులో ఉన్నాయి. అయితే అభిమానుల కళ్లంతా 'గుంటూరు కారం', 'హనుమాన్' సినిమాలపైనే ఉన్నాయి.
ముఖ్యంగా 'హనుమాన్' గురించి నెట్టింట తెగ ట్రెండ్ అవుతోంది. ముగ్గురు పెద్ద హీరోల సినిమాల మధ్య ఈ చిన్న స్టార్ చిత్రం రావడం వల్ల అభిమానుల్లో ఆసక్తి మరింత పెరిగింది. అయితే హీరో, డైరెక్టర్ చిన్నవాళ్లే అని అనుకుని సినిమా రేంజ్ను తక్కువగా అంచనా వేయడానికి వీల్లేదంటూ సినీ విశ్లేషకులు కితాబులిస్తున్నారు. ప్రముఖ టికెట్ బుక్కింగ్ యాప్లో 'బుక్ మై షో'లో ఉన్న సంక్రాంతి సినిమాలన్నింట్లోకి ఈ చిత్రం ఇప్పటివరకు అత్యధిక ఇంటరెస్ట్స్ సంపాదించడమే కాకుండా అడ్వాన్స్ బుకింగ్స్లోనూ చూపిస్తున్న జోరు చూస్తే హనుమాన్ రేంజ్ ఏంటో అర్థం అవుతుంది.
జనవరి 12న రిలీజ్ అవుతున్న ఈ చిత్రానికి ముందు రోజే పెయిడ్ ప్రీమియర్స్ వేస్తుండగా ఆ రోజుకు పెట్టిన షోలు ఇప్పటికే సోల్డ్ అవుట్ అయిపోతున్నాయి. దీంతో 'హనుమాన్' సినిమాను ఎంత మాత్రం తక్కువ అంచనా వేయలేమని అందరి మాట. అయితే గుంటూరు కారం బ్యాక్గ్రౌండ్ వేరు కాబట్టి దానికి 'హనుమాన్' చిత్రం నుంచి అంతా ముప్పు లేకపోవచ్చు. కానీ సంక్రాంతి బరిలో ఉన్న మిగతా రెండు సినిమాలకు మాత్రం ఈ సినిమా నుంచి ప్రమాదం పొంచి ఉందని సినీ వర్గాల టాక్.
సంక్రాంతి సినిమాల్లో ఆడియెన్స్ ఫస్ట్ ఛాయిస్ 'గుంటూరు కారం' అని టాక్ నడుస్తోంది. అంతే కాకుండా ఈ చిత్రానికి రెండు తెలుగు రాష్ట్రాల్లోనూ మేజర్ స్క్రీన్లు దక్కాయి. దీంతో ఈ సినిమాకు ఓపెనింగ్స్ భారీగా రానున్నాయని, ఇక తర్వాతి రెండు రోజుల్లో ఉన్న థియేటర్లలో బాగా ఆడితే ఇక ఈ సినిమా బ్రేక్ ఈవెన్ దాటుతుందని ట్రేడ్ వర్గాల సమాచారాం.
అయితే 'సైంధవ్','నా సామి రంగ' సినిమాల విషయం అలా కాదు. ప్రస్తుతానికి 'గుంటూరు కారం' తర్వాత ప్రేక్షకుల నెక్స్ట్ ఛాయిస్ 'హనుమాన్' లాగే కనిపిస్తోంది. ఇప్పటికే మంచి ఆక్యుపెన్సీ సాధించిన ఈ సినిమాకు తొలి రోజు మంచి టాక్ వస్తే ఇక ఆ ఎఫెక్ట్ 'సైంధవ్', 'నా సామి రంగ' సినిమాలపై ఖచ్చితంగా పడుతుందని టాక్. వాటికి మామూలుగానే ఓపెనింగ్స్ పెద్దగా వచ్చేలా కనిపించడం లేనందున. సంక్రాంతికి ముందుగా వచ్చే ఈ రెండు సినిమాలను చూశాకనే ప్రేక్షకులు వీటి వైపు ఎంత మేర మళ్లుతారన్నది ప్రశ్న. చూడాలి మరీ బాక్సాఫీస్ వద్ద ఈ సినిమాలకు పోటీ ఎలా ఉండనుందో ?
'హనుమాన్' ప్రీమియర్ షోస్ టికెట్స్ - ఊహించని విధంగా మైండ్ బ్లోయింగ్ రెస్పాన్స్!
