రాజస్థాన్ జలోర్ జిల్లాలో మానవత్వానికే మచ్చ తెచ్చే ఘటన జరిగింది. సొంత కూతురనే విషయాన్ని కూడా మరచిపోయి, కామంతో కళ్లుమూసుకుపోయిన ఓ తండ్రి.. ఆమెపై అత్యాచారానికి ఒడిగట్టాడు. ఈ విషయం తెలుసుకున్న బాలిక సోదరుడు, మానసికంగా కుంగిపోయి ఆత్మహత్యకు పాల్పడ్డాడు.
ఇదే తొలిసారి కాదు..
ఫోన్ కొనిస్తాననే నెపంతో.. ఇటీవలే కూతురిని బయటకు తీసుకెళ్లాడు. కొడుకుని కూడా తీసుకెళ్లమని భార్య చెప్పినా, కారులో కూతురిని మాత్రమే తీసుకెళ్లాడు. కొద్ది దూరం వెళ్లాక.. కూతురితో అసభ్యంగా ప్రవర్తించి అత్యాచారానికి ఒడిగట్టాడు.
ఆ తండ్రి ఇంత దారుణానికి ఒడిగట్టడం ఇదే తొలిసారి కాదు. బాలిక నిద్రిస్తున్న సమయంలో ఎన్నోసార్లు లైంగిక దాడికి ప్రయత్నించాడు. ఆమెను ఇంటి బయటకు ఒంటరిగా పంపేవాడు కాదు. కనీసం ఇంట్లో వాళ్లతో కూడా సరిగ్గా మాట్లాడనిచ్చే వాడు కాదు.
తండ్రి ప్రవర్తనపై ఆ మైనర్ ఎన్నో సందర్భాల్లో అరిచేది కూడా. కానీ ఇవేవీ తెలియని బాలిక తల్లి.. ఆమెను చాలా తిట్టేది. ఈ విషయాన్ని ఆ బాలిక.. తన అత్తకు ఆడియో రూపంలో పంపించింది. ప్రస్తుతం ఆ ఆడియో సామాజిక మాధ్యమాల్లో వైరల్గా మారింది. ఆ 32నిమిషాల ఆడియో విన్న బాలిక సోదరుడు మానసికంగా కుంగిపోయాడు. శనివారం, సాంచోర్ ప్రాంతంలో నర్మద కాలువలోకి దూకి ఆత్మహత్య చేసుకున్నాడు.
ఈ పూర్తి వ్యవహారంపై పోలీసులు కేసు నమోదు చేసి దర్యాప్తు చేపట్టారు. బాలిక తండ్రిని పట్టుకునేందుకు ఆమె నివాసానికి వెళ్లగా.. ఆ కిరాతకుడు అప్పటికే అక్కడి నుంచి పారిపోయాడు. అతడిని పట్టుకునేందుకు పోలీసులు రంగంలోకి దిగినట్టు అధికారులు స్పష్టం చేశారు.
ఇదీ చూడండి: పాస్టర్ ముసుగులో మూడు పెళ్లిళ్లు.. ఎలా తెలిసిందంటే..
