వరి ధాన్యం మొత్తం కొనుగోలు చేయాల్సిందేనని వైఎస్ఆర్టీపీ అధ్యక్షురాలు వైఎస్ షర్మిల డిమాండ్ చేశారు. నల్గొండ జిల్లా నార్కట్పల్లి మండలం చౌడంపల్లిలో నిరుద్యోగ నిరాహార దీక్ష చేశారు.
సీఎం కేసీఆర్ మొదట్లో ప్రతి గింజా కొంటామని చెప్పారని.. అవసరమైతే కేంద్రంతో కొట్లాడుతామన్నారని షర్మిల చెప్పారు. ఇప్పుడేమె వరి సాగుచేయొద్దని.. కేంద్రం వద్దంటోందని.. కేంద్రప్రభుత్వంపై నెపం మోపుతున్నారని షర్మిల మండిపడ్డారు.
దివంగత రాజశేఖర్రెడ్డి ముఖ్యమంత్రి హోదాలో నల్గొండకు 30 సార్లు వచ్చారని వైఎస్ షర్మిల అన్నారు. జిల్లాలోని ఫ్లోరైడ్ బాధితుల కోసం రాజశేఖర్రెడ్డి ఎన్నో కార్యక్రమాలు చేపట్టినట్లు తెలిపారు. ఉదయ సముద్రం ప్రాజెక్టు 80 శాతం పూర్తయిందని.. కేవలం మిగిలిన 20 శాతం ఇప్పటి దాకా పూర్తిచేయలేదని షర్మిల మండిపడ్డారు. రాజశేఖర్రెడ్డి బతికుంటే ఉదయ సముద్రం ప్రాజెక్టు పూర్తై నేటికి ఓ దశాబ్దం అయ్యేదన్నారు.
రాష్ట్రంలో ఎందరో అత్యాచారాలకు గురవుతున్నారని వైఎస్ షర్మిల ఆరోపించారు. రాష్ట్రాన్ని బీర్ల తెలంగాణగా మార్చారని విమర్శించారు. ఉన్నదాంతో పాటు 400 మద్యం దుకాణాలకు కొత్తగా అనుమతులిచ్చారని... మద్యం నియంత్రించాల్సింది పోయి.. వ్యవసాయాన్ని నియంత్రిస్తున్నారని కేసీఆర్పై వైఎస్ షర్మిల మండిపడ్డారు. రాష్ట్రంలో విద్యావ్యవస్థ భ్రష్టుపట్టిపోయిందని విమర్శించారు.
ఇదీచూడండి: Bandi sanjay comments on kcr speech: కేసీఆర్ వ్యాఖ్యలపై బండి సంజయ్ ఫైర్..
