ఐటీ, పురపాలక శాఖ మంత్రి కేటీఆర్కు మరో అరుదైన గౌరవం దక్కింది. జనవరి 17 నుంచి 21వ తేదీ వరకు స్విట్జర్లాండ్లోని దావోస్లో జరగనున్న ప్రపంచ ఆర్థిక ఫోరం నిర్వహించే వార్షిక సదస్సు-2022 కు హాజరుకావాల్సిందిగా డబ్య్లూఈఎఫ్ నుంచి కేటీఆర్కు ఆహ్వానం అందింది. కొవిడ్ నుంచి రాష్ట్ర ఆర్థిక వ్యవస్థ వేగంగా కోలుకోవటానికి సాంకేతికతను వినియోగిస్తూ మంత్రి కేటీఆర్ నాయకత్వంలో తెలంగాణ చూపిన విజన్కు గుర్తింపుగా ఆయన్ను ఆహ్వానించామని వరల్డ్ ఎకనమిక్ ఫోరం వెల్లడించింది.
ఈసందర్భంగా తెలంగాణ రాష్ట్రాన్ని టెక్నాలజీకి రారాజుగా మంత్రి కేటీఆర్ నిలిపారని.. ప్రపంచ ఆర్ధిక వేదిక అధ్యక్షుడు బోర్గ్ బ్రెండె ప్రశంసించారు. డబ్య్లూఈఎఫ్ సదస్సుకు తనను ఆహ్వానించటం పట్ల మంత్రి కేటీఆర్ సంతోషం వ్యక్తం చేశారు. ఈ ఆహ్వానాన్ని తెలంగాణ ప్రభుత్వం ఐటీ, పరిశ్రమలు, ఆవిష్కరణ రంగాల్లో కనబరుస్తోన్న ప్రతిభకు దక్కిన గౌరవంగా భావిస్తామని మంత్రి కేటీఆర్ అన్నారు. ఈ సందర్భాన్ని తెలంగాణ రాష్ట్ర పారిశ్రామిక అనుకూల విధానాలు ప్రపంచ వేదిక వద్ద ప్రస్తావించి గ్లోబల్ కంపెనీల పెట్టుబడుల ఆకర్షించేందుుకు ఒక అవకాశంగా మలుచుకుంటామని మంత్రి కేటీఆర్ పేర్కొన్నారు.
ఇదీ చదవండి: Laddu: గచ్చిబౌలి గణేశ్ లడ్డూకి రికార్డు రేట్... ఎన్ని లక్షలంటే?
