కొవిడ్ రోగుల్లో బ్లాక్ ఫంగస్కు చెక్ పెట్టేందుకు మరో డ్రగ్ మార్కెట్లోకి అందుబాటులోకి వచ్చింది. హైదరాబాద్కు చెందిన సెలాన్ ల్యాబొరేటరీస్ ఆంఫోటెరిసిన్ బీ అనే ఎమల్షన్ రూపంలో ఉండే డ్రగ్ను ఇవాళ మార్కెట్లోకి విడుదల చేసింది.
లిపోసోమల్ ఆంఫోటెరిసిన్ బీ అనే మెడిసిన్ను సెలాన్ కంపెనీ 2013 నుంచి ఉత్పత్తి చేస్తోంది. జర్మనీ నుంచి లిపోయిడ్స్ ముడి పదార్థాలు నిలిచిపోవటంతో.. ఎమల్షన్ రూపంలో ప్రత్యామ్నాయ మెడిసిన్ను సెలాన్ కంపెనీ తమ ఆర్ అండ్ టీం కృషి ద్వారా మూడు వారాల్లో అందుబాటులోకి తీసుకువచ్చింది.
ప్రస్తుతం బ్లాక్ ఫంగస్ వ్యాధికి మందుల కొరత తీవ్రంగా ఉన్న నేపథ్యంలో ఈ ఎమల్షన్ అందుబాటులోకి రావడం రోగులకు ఊరట కలిగిస్తోందని సెలాన్ తెలిపింది. రోజుకు పదివేల వయల్స్ ఉత్పత్తి చేసి ఆస్పత్రులు, కొవిడ్ చికిత్స కేంద్రాలకు సరఫరా చేస్తామని.. తద్వారా నెలకు 6 వేల మంది బ్లాక్ ఫంగస్ రోగులకు ఊరట లభిస్తుందని సెలాన్ పేర్కొంది.
