తీవ్ర స్థాయి పచ్చకామెర్లతో రోగి బాధ పడుతున్న విషయాన్ని పట్టించుకోకుండా ఆసుపత్రి నుంచి ఇంటికి పంపించి, ఆమె మరణానికి కారణమయ్యారంటూ ఓ వైద్యుడిని జాతీయ వినియోగదారుల వివాదాల పరిష్కార కమిషన్ (ఎన్సీడీఆర్సీ) తప్పుపట్టింది. నిర్లక్ష్యంగా వ్యవహరించినందుకు గానూ రోగి పిల్లలకు ఆ వైద్యుడు రూ. 5 లక్షల పరిహారం చెల్లించాలని ఆదేశించింది. ఆంధ్రప్రదేశ్కు చెందిన సి. పద్మావతి అనే మహిళ 2010 ఆగస్టులో తన కుడికాలి దిగువ భాగంలో ఏర్పడిన పుండు చికిత్స కోసం కర్నూలు జిల్లా నంద్యాలలోని డాక్టర్ టి.వై. విశ్వరూపాచారిని సంప్రదించింది. ఆయనకు చెందిన వీరబ్రహ్మేంద్ర నర్సింగ్హోంలో చేరింది. ఆమెకు అయిన ఇన్ఫెక్షన్ మెదడుకూ సోకిన విషయం తర్వాత బయటపడింది. మెరుగైన చికిత్స, కోసం మరో ఆసుపత్రికి తరలించినా కొద్దిరోజుల్లోనే ఆమె ప్రాణాలు కోల్పోయింది. డాక్టర్ విశ్వరూపాచారి ఆమె సమస్యను సకాలంలో గుర్తించి చికిత్స చేయలేకపోయారంటూ మృతురాలి భర్త మొదటగా జిల్లా వినియోగదారుల ఫోరాన్ని ఆశ్రయించారు. దానిని అక్కడ కొట్టివేశాక రాష్ట్ర ఫోరాన్ని ఆశ్రయించారు. రూ 1.5 లక్షల పరిహారం చెల్లించాలని రాష్ట్ర ఫోరం ఆదేశించింది. దానిని డాక్టర్ విశ్వరూపాచారి ఎన్సీడీఆర్సీలో సవాల్ చేశారు. ఆయన పిటిషన్ను జాతీయ ఫోరం కొట్టివేసి, పరిహారాన్ని రూ. 5 లక్షలకు పెంచింది. మృతురాలి భర్త ఫిర్యాదు చేసిన తేదీ నుంచి రూ. 5 లక్షల మొత్తంపై 9 శాతం వడ్డీని కూడా కలిపి ఆరు వారాల్లో చెల్లించాలంది.
ఇదీ చదవండి :
