ఒకప్పుడు కార్లలో ఎస్యూవీ(స్పోర్ట్స్ యుటిలిటీ వెహికిల్) వాహనాలకు అంతగా ఆదరణ లభించలేది కాదు. కానీ, గత కొన్ని సంవత్సరాలుగా ఈ సెగ్మెంట్ వాహనాలకు క్రేజ్ పెరిగింది. ధర ఎక్కువైనా చాలా మంది ఎస్యూవీ వాహనల వైపు మొగ్గుచూపుతున్నారు. ఒక్కప్పుడు హ్యాచ్బ్యాక్లకు ఎక్కువ డిమాండ్ ఉండేది. ఇప్పుడు ఆ స్థానాన్ని ఎంట్రీ లెవెల్, మిడ్సైజ్ కాంపాక్ట్ ఎస్యూవీలు భర్తీ చేశాయి. ఈ సెగ్మెంట్లో ముఖ్యంగా చెప్పుకోదగ్గది కారు 'హ్యుందాయ్ క్రెటా'. ఈ కారుకు ప్రజల్లో మంచి ఆదరణ లభించింది. ప్రతి నెల సగటున 12,000 యూనిట్ల చొప్పున ఈ కార్లు అమ్ముడుపోతున్నాయి. దీంతో ఈ కారుకు పోటీగా మిగతా కంపెనీలు కూడా.. అదిరిపోయే ఫీచర్లతో కొత్త మోడళ్లను మార్కెట్లోకి విడుదల చేస్తున్నాయి. హ్యుందాయ్ క్రెటాకు పోటీగా.. త్వరలో భారత విపణిలోకి విడుదల కాబోయో కార్లు ఇవే..
1. కియా సెల్టోస్ ఫేస్లిఫ్ట్
ఇప్పటికే రోడ్లపై పరుగులు పెడుతోంది కియా సెల్టోస్. ఈ కారు బేసిక్ ఫీచర్స్లో మార్పులు చేసి ఫేస్లిఫ్ట్ వర్షన్ను విడుదల చేయనున్నారు. ఈ కారు 2023 మధ్యలో విడుదలయ్యే అవకాశాలున్నాయి. రీడిజైన్ చేసిన ఎక్ట్సీరియర్తో పాటు అడాస్( అడ్వాన్స్డ్ డ్రైవర్ అసిస్టెంట్ సిస్టమ్) ఫీచర్, సరికొత్త ఇంటీరియర్తో ఈ కారు రానుంది. కియా సెల్టోస్ 1.5 లీటర్ పెట్రోల్ ఇంజిన్తో రానుంది. ఈ ఇంజిన్ 160 పీఎస్ వపర్, 253 ఎన్ఎమ్ టార్క్ జనరేట్ చేస్తుందని సమాచారం.
2. సిట్రియాన్ సీ3 ఎయిర్ క్రాస్
హ్యుందాయ్ క్రెటాకు పోటీగా విడుదలవునున్న మరో కారు సిట్రియాన్ సీ3 ఎయిర్క్రాస్. ఈ కారు 2024 ప్రథమార్ధంలో విడుదల కానుంది. సిట్రియాన్ హ్యాచ్బ్యాక్ డిజైన్ స్ఫూర్తితో ఈ కారును రూపొందించారని సమాచారం. అదిరిపోయే ఫీచర్లతో స్టైలిష్ ఇంటిరీయర్ను ఈ కారులో ఇవ్వనున్నట్లు తెలుస్తోంది. 4.2 మీటర్లున్న ఈ కారు.. 110 హెచ్పీ పవర్ జనరేట్ చేయగల సామర్థమున్న 1.2 లీటర్ టర్బో ఛార్జ్డ్ పెట్రోల్ ఇంజిన్తో వస్తోంది. ఇక, ఈ కారు 5 సీట్లు, 7 సీట్ల వేరియంట్లలో అందుబాటులో ఉండనుందని సమాచారం.
3. హోండా మిడ్ సైజ్ ఎస్యూవీ
మిడ్ సైజ్ ఎస్యూవీ సెగ్మెంట్లో హోండా నుంచి మరో కొత్త వాహనం మార్కెట్లలోకి రానుంది. ఈ కారును 2023 మధ్యలో ప్రపంచ మార్కెట్లలో విడుదల చేసే అవకాశాలున్నాయి. ఆ తర్వాత భారత్లో విక్రయాలు మొదలుపెట్టే అవకాశాలున్నట్లు తెలుస్తోంది. ఇక ఈ వాహనం హోండా సిటీ కారును రూపొందించిన ఐదో తరం ప్లాట్ ఫాంపై తయారు చేస్తున్నట్లు సమాచారం. ఈ కారు డిజైన్కు కూడా ఇదివరకు ఉన్న హోండా ఎస్యూవీల తరహాలోనే ఉండనుందని తెలుస్తోంది. ఇక, ఈ కారు 1.5 లీటర్ ఎన్ఏ పెట్రోల్, 1.5 లీటర్ హైబ్రిడ్ పెట్రోల్ ఇంజిన్తో వస్తోంది.
