ఎలక్ట్రానిక్ ఉపకరణాల తయారీ రంగం బలోపేతం కోసం ప్రభుత్వం ప్రకటించిన ఉత్పత్తి ఆధారిత ప్రోత్సాహక పథకానికి(పీఎల్ఐ).. భారీ స్పందన లభించింది. ఈ పథకం ద్వారా ప్రోత్సాహకాలను వినియోగించుకుని.. వివిధ ఉత్పత్తుల తయారీకి 52 కంపెనీలు ముందుకొచ్చాయి. ఆయా కంపెనీలన్నీ రూ.5,800 కోట్ల పెట్టుబడులు పెట్టేందుకు సిద్ధంగా ఉన్నట్లు తెలిపాయి.
ఏసీలు, ఎల్ఈడీ బల్బుల విడిభాగాల దేశీయ ఉత్పత్తికి గానూ ఈ 52 కంపెనీలు.. ఈ మొత్తం పెట్టుబడి పెట్టేందుకు సిద్ధంగా ఉన్నట్లు అధికారిక వర్గాల ద్వారా తెలిసింది. ఈ జాబితాలో ప్రపంచ స్థాయి దిగ్గజాలతో పాటు.. పలు దేశీయ సంస్థలు కూడా ఉన్నాయి.
ప్రముఖ కంపెనీలు..
డైకిన్, పానసోనిక్, హిటాచీ, మెట్ట్యూబ్, నైడెక్, ఓల్టాస్, బ్లాస్టర్, హావెల్స్, అంబేర్, ఈపాక్, టీవీఎస్ ల్యూకస్, డిక్షన్, ఆర్ కే లైటింగ్, యూనీ గ్లోబస్, రాధికా ఆప్టో, సిస్కా వంటి కంపెనీలు ఇందులో ప్రముఖంగా ఉన్నాయి.
ఈ కంపెనీలన్నీ రానున్న ఐదేళ్లలో రూ.2.71 లక్షల కోట్ల విలువైన విడిభాగాలను ఉత్పత్తి చేయొచ్చని అధికారిక అంచనా.
ఏ రంగంలో ఎన్ని కంపెనీలు?
మొత్తం మీద 31 కంపెనీలు ఏసీల విడిభాగాల ఉత్పత్తి కోసం.. రూ.5000 కోట్లు పెట్టుబడి పెట్టనున్నట్లు తమ దరఖాస్తులో పేర్కొన్నాయి. ఎల్ఈడీ బల్బుల విడిభాగాల ఉత్పత్తి కోసం 21 కంపెనీలు రూ.871 కోట్లు పెట్టుబడి పెట్టేందుకు ముందుకొచ్చాయి.
ఉత్పత్తులు ఇవే..
ఏసీలకు సంబంధించి కాపర్ ట్యూబ్స్, డిస్ప్లే యూనిట్స్, బీఎల్డీసీ మోటార్స్ వంటి వాటిని ఉత్పత్తి చేసేందుకు ఆయా కంపెనీలు ఆసక్తిగా ఉన్నాయి.
ఎల్ఈడీ బల్బుల విషయానికొస్తే.. ఎల్ఈడీ డ్రైవ్స్, ఎల్ఈడీ ఇంజిన్స్, ఎల్ఈడీ లైట్ మేనేజ్మెంట్ సిస్టమ్, పీసీబీ వంటి కాంపొనెంట్లు ప్రముఖంగా ఉన్నాయి.
పీఎల్ఐ పథకం గురించి..
ఎలక్ట్రానిక్ విడిభాగాల ఉత్పత్తి రంగాన్ని ప్రోత్సహించేందుకు రూ.6,238 కోట్లతో ఈ ఏడాది ఏప్రిల్లో పీఎల్ఐ పథకాన్ని ప్రకటించింది కేంద్రం. ఈ పథకం కింద ప్రోత్సహకాలు పొందాలనుకునే కంపెనీలు ప్రభుత్వానికి దరఖాస్తు సమర్పించేందుకు సెప్టెంబర్ 15ను తుది గడువుగా నిర్ణయించింది. ఇటీవల ఈ గడువు ముగిసిన నేపథ్యంలో ఈ గణాంకాలు వెల్లడయ్యాయి. ఆయా కంపెనీల దరఖాస్తులను పరిశీలించి.. రెండు నెలల్లోపు తుది నిర్ణయం తీసుకోనుంది ప్రభుత్వం.
వాటికి మాత్రమే ప్రోత్సాహకాలు..!
'దేశీయంగా ఏ విడిభాగాల ఉత్పత్తి తగినంతగా లేదో వాటిని తయారు చేసేందుకు ముందుకొచ్చిన కంపెనీలను ఈ పథకం కింద ఎంపిక చేయనున్నా'మని అధికారిక వర్గాలు గతంలోనే వెల్లడించాయి. పూర్తిగా తయారైన ఉత్పత్తులకు ఈ పథకం వర్తించదని కూడా స్పష్టం చేశాయి.
ఈ పథకం కింద ఎంపికైన కంపెనీలకు.. అమ్మకాల్లో ఐదేళ్ల వరకు 4 శాతం నుంచి 6 శాతం వరకు ప్రోత్సహాకాలు ఇవ్వనుంది కేంద్రం. ఈ పథకం ద్వారా ప్రత్యక్షంగా, పరోక్షంగా రెండు లక్షల మందికి ఈ రంగంలో ఉపాధి లభిస్తుందని ప్రభుత్వం అంచనా వేస్తోంది. పథకం అమలుతో ఉత్పత్తి ప్రారంభమైతే.. ఈ రంగంలో రానున్న రెండేళ్లలో దేశీయ ఉత్పత్తి విలువ ప్రస్తుతం ఉన్న 15-20 శాతం నుంచి 75-80 శాతానికి పెరగొచ్చని ప్రభుత్వం ఆశిస్తోంది.
ఇదీ చదవండి: ర్యాంకుల కోసం చైనా అక్రమాలు- వరల్డ్ బ్యాంక్ సంచలన నిర్ణయం!
