వారాంతపు సెషన్లో స్టాక్ మార్కెట్లు రికార్డు స్థాయిలో పతనమయ్యాయి. ఐదు నెలల కనిష్ఠానికి సూచీలు జారుకున్నాయి. కరోనా వైరస్ ఇతర దేశాలకు వ్యాప్తి చెందుతున్న వేళ ప్రపంచవ్యాప్తంగా మార్కెట్లు కుదేలవుతున్నాయి. ఈ ప్రభావం దేశీయ మార్కెట్లపైనా పడింది.
2015 ఆగస్టు 24 తర్వాత ఆ స్థాయిలో నేడు మార్కెట్లు నష్టపోయాయి. బొంబాయి స్టాక్ ఎక్స్ఛేంజి సూచీ- సెన్సెక్స్ 1,448 పాయింట్లు కోల్పోయి 38, 297 పాయింట్లకు చేరుకుంది. 431.55 పాయింట్లు నష్టపోయిన జాతీయ స్టాక్ ఎక్స్ఛేంజి సూచీ- నిఫ్టీ.. 11,202 పాయింట్ల వద్ద స్థిరపడింది.
జీడీపీ ప్రభావమూ..
ప్రపంచవ్యాప్తంగా కరోనా భయాలకు తోడు నేడు విడుదల కానున్న 2019-20 మూడో త్రైమాసికం జీడీపీ గణాంకాలపై ప్రతికూల అంచనాలు.. మదుపరుల సెంటిమెంట్ను దెబ్బతీశాయి.
రూ.5 లక్షల కోట్లు ఆవిరి..
భారీ నష్టాలతో బీఎస్ఈ మదుపరుల సంపద రూ.5 లక్షల కోట్లు ఆవిరైంది.
టాటా స్టీల్ 8 శాతానికిపైగా నష్టపోయింది. బజాజ్ ఫినాన్స్, టెక్ మహీంద్రా, ఇన్ఫోసిస్, ఐసీఐసీఐ బ్యాంక్ భారీగా నష్టపోయాయి. దాదాపు అన్ని కంపెనీలు నష్టాల్లోనే ఉన్నాయి.
విమానయానం, ఆటో షేర్లు కుదేలు..
కరోనా నేపథ్యంలో విమానయాన సంస్థలకు ప్రతికూల రేటింగ్ (నెగెటివ్)ను కొనసాగిస్తున్నట్లు 'ఇక్రా' ప్రకటించింది. ఈ కారణంగా విమానయాన సంస్థల షేర్లు దాదాపు 10 శాతం మేర నష్టాల్లోకి జారుకున్నాయి.
స్టాక్ మార్కెట్లలో వాహన రంగ షేర్లు కుదేలయ్యాయి. కరోనా ప్రభావంతో సరఫరా వ్యవస్థ నిలిచిపోవటం వల్ల ఆటో షేర్లు 9 శాతం పడిపోయాయి.
అంతర్జాతీయ మార్కెట్లు..
కరోనా దెబ్బకు అంతర్జాతీయ మార్కెట్లు భారీగా నష్టపోయాయి. ఐరోపా మార్కెట్లు 4 శాతం మేర పడిపోయాయి. ఆసియాలో షాంఘై 3.71 శాతం, జపాన్ 3.67 శాతం, హాంకాంగ్ 2.42 శాతం, దక్షిణ కొరియా 3.30 శాతం పతనమయ్యాయి.
