ఐటీ దిగ్గజం టాటా కన్సల్టెన్సీ సర్వీసస్ (టీసీఎస్) ఈ ఆర్థిక సంవత్సరంలో భారీగా నియామకాలు చేపట్టనుంది. సుమారు 40వేలకు పైగా ఉద్యోగులను కొత్తగా తీసుకోనుంది. ఈ మేరకు సంస్థకు చెందిన ఓ ఉన్నతాధికారి వెల్లడించారు.
ప్రైవేటు రంగంలో సుమారు 5 లక్షల మంది ఉద్యోగులతో అతిపెద్ద సంస్థగా ఉన్న టీసీఎస్..గతేడాది క్యాంపస్ సెలక్షన్స్ ద్వారా 40 వేల మందిని నియమించుకుంది. అయితే ఈ ఏడాది కూడా అంతకంటే ఎక్కువ మందిని తీసుకునేందుకు చూస్తున్నట్లు ఆ సంస్థ హెచ్ఆర్ చీఫ్ మిలింద్ లక్కడ్ తెలిపారు.
ఈ నియామకాల మీద కరోనా ఆంక్షల ప్రభావం ఏమీ ఉండడం లేదని మిలింద్ చెప్పారు. గతేడాది కూడా ప్రవేశ పరీక్ష కోసం 3.60 లక్షల మంది ఫ్రెషర్లు వర్చువల్ విధానంలో హాజరయ్యారని పేర్కొన్నారు.
"గతేడాది క్యాంపస్ సెలక్షన్స్ ద్వారా 40 వేల మందిని తీసుకున్నాం. ఈ ఏడాది కూడా అలానే 40 వేలకు మించి నియమించుకోవాలని చూస్తున్నాం. అమెరికా క్యాంపస్ల నుంచి 2వేల మందిని ట్రైనీలుగా గతేడాది సెలెక్ట్ చేశాం."
-మిలింద్ లక్కడ్, హెచ్ఆర్ చీఫ్
ఇదీ చూడండి: తొలి త్రైమాసికంలో దుమ్మురేపిన టీసీఎస్
