కరోనా భయాల నేపథ్యంలో రూపాయి విలువ గురువారం భారీగా పడిపోయింది. ప్రారంభ సెషన్లోనే 82 పైసలు క్షీణించిన రూపాయి అమెరికా డాలరులో పోలిస్తే 74.50కు చేరుకుంది.
కరోనా వైరస్ను అంతర్జాతీయ వ్యాధిగా ప్రపంచ ఆరోగ్య సంస్థ (డబ్ల్యూహెచ్ఓ) ప్రకటించింది. ఫలితంగా ఆర్థిక మందగమనంపై కరోనా భయాలు మరింతగా పెరిగాయి. అనంతరం అమెరికా అధ్యక్షుడు డొనాల్డ్ ట్రంప్ మరో కీలక ప్రకటన చేశారు. వైరస్ తీవ్రత కారణంగా బ్రిటన్ మినహా ఐరోపా దేశాలన్నింటికీ 30 రోజుల పాటు రాకపోకలు నిలిపేశారు. ఇది కూడా ప్రతికూల ప్రభావం చూపింది.
స్టాక్ మార్కెట్ల పతనమూ..
ఈ పరిణామాలన్నీ రూపాయి పతనానికి కారణమని ఫారెక్స్ ట్రేడర్లు విశ్లేషిస్తున్నారు. దీనితో పాటు దేశీయ స్టాక్ మార్కెట్లు భారీ నష్టాలతో ప్రారంభమవటం, విదేశీ నిధులు తరలిపోవటం వల్ల రూపాయి బలహీనపడిందని పేర్కొన్నారు.
అంతర్జాతీయ మార్కెట్లో 0.27 శాతం బలహీనపడిన అమెరికా డాలరు, చమురు ధరలు 6 శాతం క్షీణతతో మద్దతు లభించినా.. రూపాయి మారకంపై కరోనా భయాలు భారీగా ప్రభావం చూపాయి.
4,200 మంది మృతి..
చైనా వుహాన్లో మొదలైన కరోనా వైరస్.. ప్రపంచంలోని 107 దేశాలకు విస్తరించింది. వైరస్ కారణంగా ఇప్పటికీ వరకు ప్రపంచవ్యాప్తంగా 4,200 మంది చనిపోయారు. మరో 1,17,330 మంది వైరస్ బారిన పడ్డారు.
