బంగారు నగలపై హాల్మార్కింగ్ తప్పని సరి చేస్తూ.. కేంద్రం తీసుకొచ్చిన కొత్త రూల్స్ బుధవారం అమలులోకి వచ్చాయి. ఇకపై జువెలరీ దుకాణాలు హాల్మార్క్ ఉన్న నగలు, కళాకృతులు మాత్రమే విక్రయించాల్సి ఉంటుంది.
బంగారంపై హాల్మార్కింగ్ అనేది దాని స్వచ్ఛతను తెలియజేస్తుంది. ఈ మార్కింగ్ను బ్యూరో ఆఫ్ ఇండియన్ స్టాండర్డ్స్ (బిస్) 2000 ఏప్రిల్లో ప్రవేశపెట్టింది. ఇప్పటి వరకు ఇది స్వచ్ఛందంగా మాత్రమే అమలులో ఉంది.
అయితే వినియోగదారులకు మరింత భద్రత కలిపించడం, మోసాలకు అడ్డుకట్ట వేసే ఉద్దేశంతో.. బంగారు నగలపై హాల్మార్కింగ్ను తప్పనిసరి చేస్తూ 2019 నవంబర్లో నోటిఫికేషన్ జారీ చేసింది కేంద్రం. ఈ నిబంధనల అమలు బుధవారం ప్రారంభమైంది.
హాల్మార్కింగ్ గురించి పూర్తి వివరాలు..
- ఇకపై 14, 18, 22 క్యారెట్ల బంగారు ఆభరణాలు మాత్రమే విక్రయించేందుకు అనుమతి ఉంటుంది.
- హాల్మార్కింగ్ రిజిస్ట్రేషన్ ప్రక్రియ ఆన్లైన్ ద్వారా ఉంటుంది.
- గడిచిన ఐదేళ్లలో హాల్మార్కింగ్ సెంటర్ల సంఖ్య 25 శాతం పెరిగింది. 14 కోట్ల ఆభరణాలకు హాల్మార్కింగ్ ఇచ్చే సామర్థ్యం ఈ కేంద్రాలకు ఉంది.
- ప్రస్తుతం మొత్తం బంగారు ఆభరణాల్లో 40 శాతానికి హాల్మార్కింగ్ ఉంటోంది.
- తక్కువ క్యారెట్ బంగారాన్ని విక్రయించకుండా హాల్మార్కింగ్ నిరోధిస్తుంది. బంగారం స్వచ్ఛత వివరాలు ఆభరణాలపై ముద్రిస్తారు కాబట్టి వినియోగదారులకు హాల్మార్కింగ్ విధానం ఉపయోగకరంగా ఉంటుంది.
- ప్రస్తుతం దేశంలో 4 లక్షల ఆభరణ తయారీదారులు ఉన్నారు. ఇందులో 35,879 మందికి మాత్రమే వరల్డ్ గోల్డ్ కౌన్సిల్లో బీఐఎస్ ధ్రువీకరణ ఉంది.
- బంగారు నగలు, కళాకృతులకు మాత్రమే హాల్ మార్కింగ్ తప్పనిసరి. బులియన్, గోల్డ్ కాయిన్స్కు ఇది వర్తించదు.
- ఒక వేళ హాల్మార్కింగ్ చేసిన నగల్లో స్వచ్ఛత లోపం ఉంటే.. దానికి సర్టిఫికేట్ ఇచ్చిన సంస్థను బాధ్యులను చేస్తారు. చట్ట రీత్యా వారికి శిక్ష లేదా కనీసం రూ.లక్ష జరిమానా విధిస్తారు.
- హాల్మార్కింగ్ విషయంలో లోపాలు, తప్పుల గురించి సమీపంలోని బిస్ ఆఫీస్లో లేదా.. ఆన్లైన్లో బిస్ మొబైల్యాప్, వెబ్సైట్ ద్వారా ఫిర్యాదు చేయొచ్చు.
ఇదీ చదవండి:బంగారం కాస్త ప్రియం- పెట్రోల్ రేట్ల కొత్త రికార్డు
