2070 నాటికి కర్బన ఉద్గార రహిత దేశంగా భారత్ మారుతుందని ప్రధానమంత్రి నరేంద్ర మోదీ.. గ్లాస్గోలో జరిగిన కాప్26 సదస్సులో ప్రకటించారు. ఈ లక్ష్యాన్ని అందుకోవాలంటే.. దేశంలోని సౌరశక్తి సామర్థ్యం 5,600 గిగావాట్లకు చేరాలని, 2060 నాటికి బొగ్గు వినియోగం (ముఖ్యంగా విద్యుత్ రంగంలో) 99శాతం పడిపోవాలని సీఈఈడబ్ల్యూ ఇండియా(కౌన్సిల్ ఆన్ ఎనర్జీ, ఎన్విరామ్నెంట్, వాటర్) అంచనా వేసింది. అదే సమయంలో చమురు వినియోగం 2050 నాటికి తారస్థాయికి చేరుకుని అక్కడి నుంచి రెండు దశాబ్దాల పాటు కిందకు దిగిరావాల్సి ఉంటుందని స్పష్టం చేసింది. లక్ష్యాన్ని సాధించడానికి 2030- 2100 వరకు దాదాపు 13వేల బిలియన్ డాలర్లను దేశం ఖర్చు చేయాల్సి ఉంటుందని అంచనా వేసింది.
"నెట్-జీరో కోసం ముందుగా.. విద్యుత్ రంగంలో బొగ్గు వినియోగంపై దృష్టిపెట్టాలి. అసలు బొగ్గు వినియోగమే లేకుండా చేయాలి. 2040 వరకు బొగ్గు వినియోగం పెరిగినా, 2060 నాటికి దానిని 99శాతం మేర తగ్గించాలి. సౌరశక్తి ఆధారిత విద్యుత్ ఉత్పత్తి సామర్థ్యాన్ని 2050 నాటికి 1,689గిగావాట్లకు పెంచాలి. 2070 నాటికి దానిని 5,630గిగావాట్లకు చేర్చాలి. వాయు ఆధారిత విద్యుత్ ఉత్పత్తి సామర్థ్యాన్ని 2050కి 557గిగావాట్లు, 2070 నాటికి 1792 గిగావాట్లకు తీసుకెళ్లాలి. అటు 2070 నాటికి ఎలక్ట్రిక్ వాహనాల అమ్మకాలు 84శాతానికి చేరాలి. సరకు రవాణా ట్రక్కులో విద్యుత్ వాహనాల వాటా 2070 నాటికి 79శాతానికి పెరగాలి. మిగిలినవి హైడ్రోజెన్ ద్వారా నడిపించాలి. "
--- సీఈఈడబ్ల్యూ ఇండియా.
దేశ పునరుత్పాదక శక్తి సామర్థ్యం 2030 నాటికి 450గిగావాట్లకు చేరాలని తొలుత లక్ష్యంగా పెట్టుకున్నారు. గ్లాస్గోలో ప్రసంగించిన మోదీ.. ఆ లక్ష్యాన్ని 500గిగావాట్లకు పెంచారు. దేశంలో సగానికిపైగా విద్యుత్ ఉత్పత్తి పునరుత్పాదక శక్తితోనే జరుగుతుందని హామీనిచ్చారు. వాతావరణ మార్పులు కట్టడి చేసేందుకు పారిస్ ఒప్పందంలోని తీర్మానాలకు అనుగుణంగా కార్యాచరణ చేపట్టిన ఏకైక దేశం భారత్ అని చెప్పారు. వాతావరణ మార్పుల కట్టడి కోసం భారత్ ఎంతో శ్రమిస్తోందని.. దాని ఫలితాలు త్వరలోనే వస్తాయని పేర్కొన్నారు.
ఇదీ చూడండి:- డిస్కమ్‌లకు విద్యుదాఘాతాలు- నియంత్రణ మండళ్ల పనితీరు నిస్తేజం
