Edible oil Price Decrease: సామాన్యులకు కాస్త ఊరటనిస్తూ ప్రధాన కంపెనీలు తమ వంటనూనె ఉత్పత్తుల ధరలను ఎమ్ఆర్పీపై రూ. 30-40 తగ్గించాయి. ఈ మేరకు సాల్వెంట్‌ ఎక్స్‌ట్రాక్టర్స్‌ అసోసియేషన్‌ ఆఫ్ ఇండియా(ఎస్ఈఏ) ఓ ప్రకటనలో తెలిపింది.
ఏఏ బ్రాండ్లంటే..?
అదానీ విల్మార్ (ఫార్చ్యూన్ బ్రాండ్), రుచి సోయ( మహాకోష్, సన్రిచ్, రుచి గోల్డ్, న్యూట్రెల్లా బ్రాండ్స్), ఇమామి( హెల్తీ అండ్ టెస్టీ బ్రాండ్స్), బంగే(డాల్డా, గగన్, ఛంబల్ బ్రాండ్స్), జెమిని(ఫ్రీడమ్ సన్ ఫ్లవర్ ఆయిల్ బ్రాండ్స్), సీఓఎఫ్సీఓ (న్యూట్రిలైవ్ బ్రాండ్‌లు), ఫ్రిగోరిఫికో అల్లానా (సన్నీ బ్రాండ్‌లు), గోకుల్ ఆగ్రో (విటాలైఫ్, మహేక్, జైకా బ్రాండ్‌లు)తో పాటు ఇతర బ్రాండ్‌లు కూడా ధరలు తగ్గించాయని ఎస్ఈఏ పేర్కొంది.
"వంట నూనెల ధరల తగ్గింపుపై ప్రధాన కంపెనీలు సానుకూలంగా స్పందించాయి. ఎమ్ఆర్పీపై రూ. 30-40 తగ్గించాయి. వచ్చే పండుగ ముందు ఈ విషయాన్ని తెలుపడానికి సంతోషిస్తున్నాము."
-ఎస్ఈఏ(సాల్వెంట్‌ ఎక్స్‌ట్రాక్టర్స్‌ అసోసియేషన్‌ ఆఫ్ ఇండియా)
Edible Oil Price News: వంట నూనెల ధరల తగ్గింపుపై కొన్ని రోజుల క్రితం కేంద్ర ఆహార శాఖ కార్యదర్శి సుధాన్షు పాండే.. ప్రధాన కంపెనీల యాజమాన్యాలతో సమావేశం నిర్వహించారు. ఆ తర్వాత వంటనూనెల ధరలను తగ్గిస్తున్నట్లు ఆయా కంపెనీలు ఇటీవలే ప్రకటించాయి.
వంట నూనెల ఉత్పత్తులపై దిగుమతి పన్ను భారాన్ని కేంద్రం ఇటీవల తగ్గించింది. రిఫైన్డ్‌ పామాయిల్‌పై కస్టమ్స్ డ్యూటీని 17.5 శాతం నుంచి 12.5 శాతానికి సవరించింది. డిసెంబర్ 2022 వరకు లైసెన్స్ లేకుండానే రిఫైన్డ్‌ పామాయిల్‌ను దిగుమతి చేసుకోవడానికి వ్యాపారులకు అనుమతించింది.
ఇదీ చదవండి: కొత్త ఏడాదిలో దుస్తులు, పాదరక్షల ధరలకు రెక్కలు!
