కరోనా కారణంగా పెరిగిన డిజిటల్ లావాదేవీల వల్ల ఇటీవలి కాలంలో దేశంలో సైబర్ దాడులు విపరీతంగా పెరిగిపోయాయని నిపుణులు అంటున్నారు. అయితే మహమ్మారి తర్వాత ఈ పరిస్థితులు మరింత దారుణంగా ఉంటాయని సైబర్ అధ్యయనాలు వెల్లడిస్తున్నాయి.
ఐటీ పరిశ్రమకు తీవ్ర ఆందోళన కలిగించే రీతిలో ఇటీవలి కాలంలో సైబర్ మోసాలు జరుగుతున్నాయని తాజా అధ్యయనాల్లో వెల్లడైంది. దక్షిణాది నగరాలైన చెన్నై, బెంగళూరులు సైబర్ దాడిలో ముందువరుసలో ఉన్నట్లు తేలింది.
ఈ విషయమై దిల్లీకి చెందిన సైబర్ నిపుణుడు ముకేశ్ చౌదరి స్పందించారు. కరోనా వ్యాప్తి నేపథ్యంలో సైబర్ నేరగాళ్లు.. మోసగించే పద్ధతులను కూడా మార్చుకున్నారని తెలిపారు.
'లాక్డౌన్ సమయంలో ఇంటర్నెట్ వాడకం పెరిగింది. దీన్ని ఆసరాగా చేసుకొని మరిన్ని మోసాలకు పాల్పడుతున్నారు సైబర్ కేటుగాళ్లు. మద్యం అమ్మకం, కొవిడ్ కేర్ వంటి పేర్లతో నకిలీ మొబైల్ అప్లికేషన్స్ సృష్టించి వీటి ద్వారా సైబర్ నేరాలకు పాల్పడుతున్నారు. దేశంలో ఐటీ హబ్లుగా పేరొందిన చెన్నై, బెంగళూరు నగరాల్లో సైబర్ మోసాలు అధికమవుతున్నాయి. కాబట్టి వినియోగదారులు మరింత అప్రమత్తంగా ఉండాలి.'
- ముకేశ్ చౌదరి, సైబర్ నిపుణులు, దిల్లీ
టాప్-3లో ఇవే..
ఓ ప్రైవేట్ సైబర్ సెక్యూరిటీ సంస్థ- కే7 విడుదల చేసిన గణాంకాల ప్రకారం.. అధిక సైబర్ మోసాలు జరుగుతున్న నగరాలలో చెన్నై(42%) తొలిస్థానంలో ఉంది. బెంగళూరు, పట్నాలు (38%) రెండోస్థానంలో ఉండగా.. హైదరాబాద్, కోల్కతాలు (35%) ఆ తరువాతి స్థానంలో ఉన్నాయి.
'విండోస్' లక్ష్యంగా..
సైబర్ నేరగాళ్లు ఎక్కువగా మైక్రోసాఫ్ట్కు చెందిన విండోస్-ఎక్స్పీ, విండోస్-7 ఆపరేటింగ్ సిస్టమ్లనే లక్ష్యంగా చేసుకున్నారని కే7 సీఈఓ కేశవర్ధన్ తెలిపారు. ఫలితంగా, మైక్రోసాఫ్ట్.. ఈ రెండూ సాఫ్ట్వేర్లను అప్డేట్, మెరుగుపరచడం నిలిపివేసిందని ఆయన స్పష్టం చేశారు.
ఇదీ చదవండి: 'బాయ్‌కాట్‌ చైనా' వల్ల ఎవరికి లాభం?.. ఎవరికి నష్టం?
