జైడస్‌ క్యాడిలా రూపొందించిన కొవిడ్‌ టీకా జైకొవ్-డి(Zycov-D Zydus Cadila) కోటి డోసుల కోసం కేంద్ర ప్రభుత్వం ఆర్డర్ చేసిన విషయం తెలిసిందే. అయితే, మూడు డోసుల్లో తీసుకోవాల్సిన ఈ టీకాను కేంద్ర ప్రభుత్వానికి ఒక డోసుకు రూ.265కు ఇచ్చేందుకు జైడస్‌ క్యాడిలా అంగీకరించినట్లు ఆ సంస్థ వెల్లడించింది.
అయితే, టీకా పంపిణీ కోసం సూది అవసరం లేకుండా ఇంజెక్టర్ను వాడనున్నారు. దీని ధర రూ.93 కలుపుకొని (జీఎస్‌టీ కాకుండా) జైకొవ్-డి(Zycov-D Zydus Cadila) ఒక డోసు ధర రూ.358 అవుతుందని పేర్కొంది. కేంద్రంతో సంప్రదించిన తర్వాతే ఈ ధరను నిర్ణయించినట్లు జైడస్‌ క్యాడిలా ఓ ప్రకటనలో తెలిపింది.
తొలి టీకాగా..
దేశంలో 12 ఏళ్ల వయసు పైబడిన పిల్లల కోసం అనుమతి పొందిన తొలి టీకాగా జైకొవ్-డి నిలిచింది. అయితే, ఈ టీకాను మూడు డోసుల్లో తీసుకోవాల్సి ఉంటుంది. దీంతో ఒక్కో డోసు ఖరీదు రూ.265 కాగా.. ఇంజెక్టర్కు రూ.93, 5శాతం జీఎస్‌టీ (రూ.18) అదనంగా చెల్లించాల్సి ఉంటుంది. ఇలా మూడు డోసులకు మొత్తంగా రూ.1128గా అవనున్నట్లు తెలుస్తోంది. అయితే, మూడు డోసుల్లో అందించే ఈ టీకాను తొలుత రూ.1900కు అందజేస్తామని జైడస్‌ క్యాడిలా ప్రతిపాదించింది.
ఇప్పటికే అందుబాటులో ఉన్న టీకాలతో పోలిస్తే జైడస్‌(Zycov-D Zydus Cadila) ధర ఎక్కువగా ఉండడంతో కేంద్ర ప్రభుత్వం ఆ సంస్థతో సంప్రదింపులు జరిపింది. దీంతో చివరకు ఒక డోసును రూ.265కు ఇచ్చేందుకు జైడస్‌ అంగీకరించినట్లు సమాచారం. సూది లేకుండా వాడిపారేసే ఇంజెక్టర్ను వినియోగించనున్నందున దాని ధర రూ.93 కలుపుకొని.. ఒక డోసుకు రూ.358 అవుతుంది.
ఇదిలాఉంటే, సూది అవసరం లేకుండా మూడు డోసుల్లో ఇచ్చే ఈ టీకాను 12ఏళ్ల వయసుపైబడిన వారికి ఇచ్చేందుకు ఆగస్టు 20వ తేదీనే కేంద్ర ప్రభుత్వం ఆమోదం తెలిపింది. ఒక్కో డోసును 28రోజుల వ్యవధి చొప్పున తీసుకోవాల్సి ఉంటుంది. గుజరాత్‌కు చెందిన జైడస్‌ క్యాడిలా రూపొందించిన ఈ టీకా.. ప్రపంచంలోనే అనుమతి పొందిన డీఎన్‌ఏ ఆధారిత తొలి కరోనా టీకాగా నిలిచింది.
ఇదీ చూడండి: కోటి జైకొవ్-డి టీకాల కోసం కేంద్రం ఆర్డర్
