Bounce Infinity Electric Scooter: రైడ్ బుకింగ్ సంస్థ అయిన బౌన్స్.. తన మొదటి ఎలక్ట్రిక్ స్కూటీని విడుదల చేసింది. అందరికీ అందుబాటులో ఉండేలా దీని ధరను నిర్ణయించింది. దీనికి తోడు అనేక ప్రత్యేక ఫీచర్లను జోడించింది. అవి ఏంటో తెలుసుకుందాం.
Bounce Infinity Electric Scooter Price..
ధర...
బౌన్స్ తీసుకువచ్చిన మొదటి ఎలక్ట్రిక్ స్కూటర్ విలువ కేవలం రూ. 68,999 గా నిర్ణయించింది. స్కూటర్తో పాటు బ్యాటరీ, ఛార్జర్ను ఇవ్వనుంది సంస్థ. అంతేగాకుండా బ్యాటరీ లేకుండా ఈ స్కూటర్ను తీసుకున్నట్లైతే.. కేవలం రూ. 36 వేలకే రానున్నట్లు సంస్థ తెలిపింది.
ఎలక్ట్రిక్ స్కూటర్లకు సంబంధించి ఇప్పటికే మార్కెట్లో పోటీదారులుగా ఉన్న ఓలా ఎస్ఓన్, బజాజ్ చేతక్ ఎలక్ట్రిక్, టీవీఎస్ ఐక్యూబ్, అథేర్ 450X లాంటి కంపెనీలకు ధర విషయంలో గట్టి సవాలు విసిరింది బౌన్స్. డిసెంబర్ రెండో వారం నుంచి టెస్ట్ రైడ్స్ను ప్రారంభించనుంది. వచ్చే ఏడాది మార్చి నుంచి ఈ ఈవీలను డెలివరీ చేయనున్నట్లు తెలిపింది.
Bounce Infinity Electric Scooter Features..
బౌన్స్ ఈవీ ఫీచర్లు...
బ్యాటరీ..
బౌన్స్ ఇన్ఫినిటీ స్కూటర్తో పాటు బ్యాటరీని విడిగా కూడా తీసుకునే అవకాశం కల్పించింది సంస్థ. దీని వల్ల వినియోగదారులు బ్యాటరీ లేకుండా ఈ ఈవీని కొనుగోలు చేయవచ్చు. దీంతో వినియోగదారులు కావాలంటే ఖర్చు తగ్గించుకోవచ్చని తెలిపింది.
సింగిల్ ఛార్జ్తో 85 కి.మీ..
బౌన్స్ ఇన్ఫినిటీ స్కూటర్లో ఉండే బ్యాటరీని ఒకసారి ఛార్జ్ చేస్తే.. సుమారు 85 కి.మీ వరకు ప్రయాణం చేయవచ్చని సంస్థ తెలిపింది. గరిష్ఠంగా 65 కి.మీ వేగంతో ఈ స్కూటర్పై ప్రయాణించవచ్చని చెప్పింది.
డ్రాగ్ మోడ్..
ఈ స్కూటర్లో ఉన్న మరో ఫీచర్.. డ్రాగ్ మోడ్. దీని ద్వారా స్కూటర్కు పంక్చర్ అయితే ఇది వాహనదారుడిని వెంటనే అప్రమత్తం చేస్తుంది. డ్రాగ్ మోడ్తో పాటు.. దీనిలో పవర్ అండ్ ఎకో మోడ్లు కూడా ఉన్నాయి.
కనెక్టివిటీ..
ఈ స్కూటర్ను స్మార్ట్ఫోన్తో కనెక్ట్ చేసుకోవచ్చు. ఇందుకోసం ప్రత్యేకంగా ఓ యాప్ను సిద్ధం చేసింది బౌన్స్. దీని ద్వారా స్కూటర్కు సంబంధించిన సమాచారంతో పాటు కొన్ని ఫీచర్లను ఫోన్ నుంచే ఆపరేట్ చేయవచ్చు.
రెట్రో-మోడ్రన్ డిజైన్తో...
బౌన్స్ నుంచి వచ్చే ఈ ఈవీ.. రెట్రో-మోడ్రన్ డిజైన్తో రానుంది. రెట్రో స్టైల్తో, మోడ్రన్ ఎలిమెంట్స్తో రూపొందించారు. దీనిలో ఎల్ఈడీ హెడ్ ల్యాంప్, పగటి పూట వెలుగుతుండే లైట్, డిజిటల్ ఇన్స్ట్రుమెంట్ క్లస్టర్, అల్లాయ్ వీల్స్, ముందు, వెనక చక్రాలకు డిస్క్ బ్రేక్లు లాంటి ఫీచర్లు ఈ స్కూటర్లో ఉండనున్నాయి.
ఐదు రంగుల్లో...
బౌన్స్ ఇన్ఫినిటీ ఈ1 పేరుతో వస్తున్న ఈ స్కూటర్ మొత్తంగా ఐదు రంగుల్లో రానుంది. స్పార్కెల్ బ్లాక్, కొమెట్ గ్రే, స్పోర్టీ రెడ్, పెరల్ వైట్, డీసాట్ సిల్వర్ రంగుల్లో ఉండనుంది.
ఫుల్లీ డిజిటల్ స్పీడో మీటర్...
ఈ స్కూటర్ ఫుల్లీ డిజిటల్ స్పీడో మీటర్తో రానుంది. స్కూటీకి సంబంధించిన సమాచారం ఆ డిజిటల్ మీటర్లో రైడర్ చూడొచ్చు. ముఖ్యంగా ఇగ్నిషన్ స్టేటస్, సైడ్ స్టాండ్, ఇండికేటర్స్, బ్యాటరీ స్టేటస్, స్పీడ్ డిస్ప్లే, ఓడో మీడర్ రీడింగ్, వెహికల్, బ్లూటూత్ , హై బీమ్ స్టేటస్ను చూడవచ్చు.
ఇదీ చూడండి: జనవరి నుంచి ఆ కార్లు మరింత కాస్ట్లీ
